Ռոմանոս Պետրոսյանը «արդարացրեց» իր նշանակումը

Բնապահպանության նախարար Ռոմանոս Պետրոսյանը Ֆեյսբուքի իր էջում այնպիսի գրառում է արել, որը լրջորեն հիմք է տալիս կասկածի տակ առնել նախարարի հիշողությունը՝ արդոք նա ընդհանրապես հիշո՞ւմ է, թե օրեր առաջ ինչ պաշտոնի է նշանակվել: Դիցուք նա գրել է՝ «Վիճակագրական տվյալների համաձայն՝ 2019 թվականին Հայաստանի ՀՆԱ-ի մեջ հանքարդյունաբերության (հանքագործական արդյունաբերություն և բացահանքերի շահագործում) բաժինը կազմել է 2.8%։ Հարկային տարվա խոշոր հարկատուների առաջին տասնյակում 2-ը ներկայացնում են այս ոլորտը։ Հանքարդյունաբերության ազդեցությունը մեր երկրում մրցունակ տնտեսություն ունենալու, ներդրումային ոլորտի խթանման, սոցիալական խնդիրների լուծման և տարածաշրջանի զարգացման վրա շարունակում է մնալ կարևոր և ենթադրում է խիստ զգուշավոր վերաբերմունք»։ 

Դժվար է անգամ պատկերացնել, որ հատուկ վարձած լոբբիստների մի ամբողջ խումբ ավելի լավ «փիառ» կարող էր անել հանքաարդյունաբերության յուղոտ բիզնեսի մեջ թաթախված հանքերի սեփականատերերին, քան դա անում է նախարար Պետրոսյանը: Սակայն, հուշենք նախարարին, որ նա այդ պաշտոնին նշանակվել է բնությունը, այլ ոչ թե հանքերի սեփականատերերի շահերը պաշտպանելու համար:

Նախարարի ասածից ենթադրում է, որ եթե հանքերը փակենք՝ կարող է դատարկվի բյուջեն: Այստեղ էլ հուշենք՝ բյուջեն չի դատարկվի, եթե փակվեն հանքերը, բայց նաև պաշտոնյաները չափավորեն պարգևատրվելու մոլուցքը: Բացի այդ հետաքրքիր է, որ մեկ շաբաթ առաջ նախարարը հրաժարվում էր կարծիք հայտնել Ամուլսարում տեղի ունեցողի մասին, այժմ հարց է ՝ նրա այս կարծիքը իրե՞նն է, թե՞ թելադրված է այն մարդկանց կողմից, ովքեր նշանակել են Պետրոսյանին, որպեսզի վերջինս առաջ տանի և իրագործի իրենց կարծիքները և պլանները…