Ի՞նչ է անում Լուկաշենկոյի ինքնաթիռը Բազելում

«Ինքնաթիռը, որը հավանաբար գտնվում է Բելառուսի նախագահի և նրա ընտանիքի բացառիկ տրամադրության տակ, արդեն մի քանի օր է, ինչ գտնվում է Շվեյցարիայում: Եվ ոչ ոք չգիտի, թե ինչու»,- հաղորդել է շվեյցարական հրատարակություն Tages-Anzeiger-ը:

Լրագրող Բերնհարդ Օդենալը հոդվածում գրել է, որ Բազելը հեռու է Մինսկից, և դեպի Շվեյցարիա ուղիղ չվերթներ չկան:Այնուամենայնիվ, օգոստոսի 30-ին մի ինքնաթիռ ուղիղ թռիչք է կատարել:

«Ավիահաղորդագրություններին հետևող Radarbox կայքի տվյալների համաձայն՝ Gulfstream G550 տեսակի բիզնես ինքնաթիռը 13:00-ից մի փոքր անց Մինսկից թռել է և 2 ժամ անց վայրէջք կատարել Բազելում: Բազել-Մյուլուզ-Ֆրայբուրգ օդանավակայանի մամլո ծառայությունը հարցմանն ի պատասխան, հաստատել է ինքնաթիռի վայրէջքը: Այդ ժամանակից ի վեր ինքնաթիռը, հավանաբար, Բազելում է: Նրա մեկնումի մասին տեղեկություններ չկան»,- նշված է հոդվածում:

Օդենալը գրել է, որ ինքնաթիռը ներկված է Բելառուսի դրոշի գույներով:

«Գունային ձևավորումը գրեթե նույնական է Բոյինգ-747-ին, որը նախագահ Ալեքսանդր Լուկաշենկոն բռնապետական ոճով օգտագործում է որպես թիվ մեկ ինքնաթիռ: EW-001PJ համարանշով ինքնաթիռը, որը 7 օր առաջ վայրէջք է կատարել Բազելում, հավանական է, որ գտնվում է Լուկաշենկոյի և նրա ընտանիքի բացառիկ տրամադրության տակ: Սրա մասին հունվարին առաջին անգամ հաղորդել է ընդդիմական պորտալ NEXTA-ն: Դրանից հետո կառավարության ներկայացուցչուհին ժխտել է Լուկաշենկոյի սեփական ինքնաթիռ ունենալը: Բայց և այնպես, այն կարող էր ձեռք բերվել կառավարության հաշվին»,- նշել է լրագրողը:

Հոդվածում նշվել է,որ Լուկաշենկոյի որդի  Վիկտորը, ով վերահսկում է անվտանգության ապարատը, մեղադրվում է ցուցարարների նկատմամբ կոշտ հակազդեցություններ գործելու մեջ: Վերջին անգամ Վիկտոր Լուկաշենկոն պաշտոնական այցով գտնվել է Շվեյցարիայում 2020 թվականի հունվարին: Բայց հարց է առաջանում՝ հիմա ի՞նչ գործ ունի բելառուսական Gulfstream EW-001PJ-ը Բազելում:

Բազելի օդանավակայանին քաջածանոթ աղբյուրի կարծիքով հավանական է, որ ինքնաթիռը մեկնել է Շվեյցարիա տեխսպասարկման նպատակով:

«Դժվար թե այսքան երիտասարդ ինքնաթիռը լուրջ տեխնիկական աշխատանքների կարիք ունենա: Իսկ եթե անգամ անհրաժեշտություն կա, ինչու՞ հենց Շվեյցարիայում: Բազելի օդանավակայանում կան ընկերություններ, որոնք մասնագիտացված են ոչ միայն վերանորոգման, այլև՝ մասնավոր ինքնաթիռների շքեղ ձևավորման մեջ»,- նշել է հոդվածի հեղինակը:

Հետաքրքիր է, որ Շվեյցարիայում Բելառուսի պատվավոր հյուպատոսը նույնպես տեղեկություն չունի վերոնշյալ ինքնաթիռի Բազելում գտնվելու մասին:

«Ավելի վաղ հեռախոսի միջոցով նրա (հյուպատոսի) աշխատողը ռուսական ուժեղ առոգանությամբ հերքել է, որ բելառուսական ինքնաթիռն ընդհանրապես կարող է գտնվել Շվեյցարիայում: Նրա խոսքերով՝ «դա 100%-ով սուտ տեղեկատվություն է»», - փոխանցել է Tages-Anzeiger-ը:

Լիլիթ Ոսկանյան

Pressmedia.am