Քոչարյանին այլևս գնահատել պետք չէ. Հայկ Մարտիրոսյան
Pressmedia.am կայքի զրուցակիցը քաղաքագետ Հայկ Մարտիրոսյանն է։
- Պարոն Մարտիրոսյան, վերջերս ակտիվացել են Լավրովի պլանի մասին խոսակցությունները: Լավրովն ինքն է խոսել դրա մասին, Մադրիդյան սկզբունքների մասին, բայց նախօրեին Արցախի ԱԳ նախարար Մասիս Մայիլյանը նշել է, որ Մադրիդյան սկզբունքները այլևս չեն քննարկվում: Ձեր կարծիքով, որքանո՞վ այդ սկզբունքներն այսօր գոյություն ունեն առհասարակ:
- Նախ, ի պաշտոնե, ով է Մասիս Մայիլյանը: Չճանաչված, ինքնահռչակ, Հայաստանից սեպարացված՝ անջատված, իսկ իրականում՝ Հայաստանի մի հատվածի ինքնահռչակ վարչախմբի ինքնահռչակ արտգործնախարա՞ր: Այդպես ես էլ կարող եմ ասել, որ վեցերորդ հռոմեական կայսրության կայսրն եմ: Իրականում հենց այդ հանգամանքից ելնելով, ո՛չ Մայիլյանը և ո՛չ անգամ նրա ղեկավար Արայիկ Հարությունյանը չեն կարող տեղյակ լինել, թե ինչ է քննարկվում, ինչ է սեղանին, կամ ինչ է սեղանի տակ: Նրանց հետ Մինսկի խումբը չի աշխատում, եթե հաշվի չառնենք ձևական մեկ-երկու հանդիպումներ: Եվ չեմ կարծում, թե իր քննարկածները Արցախի վարչախմբին մանրամասն հայտնում է նաև Փաշինյանը: Ինչ վերաբերվում է քննարկվողին՝, եթե Մադրիդյան սկզբունքները չկան, ապա ու՞ր են դրանք անէացել: Կա՞ հայտարարություն այն մասին, որով երեսուն տարի սեղանին եղած սկզբունքներն այլևս չեն քննարկվում: Համանախագահները հայտարարե՞լ են դա: Իսկ Երևա՞նը, իսկ Բաքու՞ն: Իհարկե ոչ: Եվ փաշինյանամոլ տգետներին հայտնենք, որ իրենց ստանդարտ հիմար բացատրությունները, թե «կան բաներ, որ գաղտնի են, և գուցե դա հենց այդ դեպքն է» հենց դա են՝ պարզ հիմարություններ: Նման իրավիճակի փոփոխությունը, եթե այն լինում է, լինում է ոչ միայն հրապարակային, այլև՝ խիստ հրապարակային: Ես կասեի՝ անչափ հրապարակային: Այլ կերպ չի լինում: Գուցե մեր տգետների խմբակների մակարդակում լինում է, բայց միջազգային քաղաքականությունում՝ ոչ: Իսկ սա այն թեման է, որ միջազգային քաղաքականության մեջ կարևոր տեղ է զբաղեցնում: Ուրեմն մնացածը հիմարություններ են: Մադրիդյան սկզբունքերը կան, դրանք սեղանին են, և թեև այս պահին ակտիվ բանակցություններ չկան, բայց դրանք ինչպես կենդանի էին Սերժ Սարգսյանի օրոք, այնպես էլ կենդանի են այսօր: Մնացածը հերթական խաբեությունն է, որով կերակրում են մեր ժողովրդին:
- Հայաստանի ԱԳ նախարար Զոհրաբ Մնացականյանն էլ հայտարարել է, որ պատրաստ ենք վերսկսել հանդիպումները, բանակցությունները: Սա ինչպե՞ս եք գնահատում:
- Զոհրաբ Մնացականյանի որևէ ասած խոսք կարելի՞ է արդյոք լավ գնահատել: Հատկապես այս մեկը: Խայտառակ, անինքնասեր, անարժանապատիվ հայտարարություն է, որ հարիր է հենց այդպիսի որակներ ունեցող ռեժիմին:
- Վերջին շրջանում նորից ակտիվացել է Ռուբերտ Քոչարյանը, ով հարցազրույց է տվել RBK-ին, ինչպես նաև Հայաստանում հարցազրույց է տվել տնտեսագետներին և այլն: Ինչպե՞ս եք սա գնահատում:
-Քոչարյանին այլևս գնահատել պետք չէ: Այսօր նա բանտում կլիներ, եթե տասնութ թվականի ժողովրդական ալիքից չօգտվեր Փաշինյանը, այլ մեկ այլ մեկը, որ ազնիվ կլիներ և շարժումն իրական հեղափոխության կվերածեր: Քոչարյանին հրապարակում պահում է, նրան քաղաքականություն վերադարձրել է իրականում Նիկոլ Փաշինյանը: Անուղղակիորեն, իհարկե: Եվ հենց նա էլ հանդիսանում է այն միակ պատասխանատուն, որի խղճին է մնալու նախկին ռեժիմի այսքան ակտիվացումն ու արդեն քաղաքական դաշտում դրա գոյության ընկալման նորմալացումը հասարակության մեջ: Իսկ Քոչարյանն օգտվում է դրանից: Իսկ ո՞վ չէր օգտվի: Թող արդարադատություն կիրառվեր և թող քաղաքական-կուսակցական, անձնական շահը չգերադասվեր հանրային-պետական շահին և այսօր Հայաստանում օրակարգում կլինեին միայն ապագային վերաբերող հարցեր, և ո՛չ անցյալի ճիրաններում ավելի ու ավելի դեպի ճահիճ քաշվելու իրականությամբ պարուրված կլինեինք:
Սոնա Երիցյան
1
2
3
4
5
3
4
5
2
3
4
5
