«Եթե այսպես շարունակվի, երեխաները կսկսեն ատելությամբ վերաբերվել ուսումնական պրոցեսին». Ռուբեն Մելիքյան

Կարանտին թե՞ արտակարգ դրություն: Հնչում է շեքսպիրյան հայտնի աքսիոմայի նման՝ «լինել թե՞ չլինել»:

Երկու հասկացությունների մասին շատերն են խոսել, գտել, որ չկան առանձնակի տարբերություններ, իրավանբանների մի խումբ էլ հայտնում է, որ ռեժիմը պետք է ավելի մեղմանար, բայց արի ու տես, որ այն ավելի խստացվեց:

Pressmedia.am-ը իրավական կարգավորումների և ձևաչափի տարբերության ու կիրառվող մեղմացումների մասին զրուցել է «Իրավական ուղի» ՀԿ համահիմնադիր Ռուբեն Մելիքյանի հետ, ով թերևս նշեց որակական փոփոխություններ նկատելի չեն, սակայն դրանք առկա են.

«Այլևս մարդկանց տեղաշարժը չի վերահսկվում հեռախոսազանգերի միջոցով», - ասաց և հիշեցրեց, որ այս օրենքի ընդունումը խնդրահարույց էր:

Այն Ազգային ժողովը մերժեց, մի քանի ժամ անց կրկին նույն օրինագիծը եկավ ԱԺ, կրկին քվեարկեցին և ընդունվեց:

Հաջորդը՝ միջոցառումներին նախկին 40 հոգու փոխարեն, առայժմ կարող են մասնակցել 60 հոգի: Քչերը գիտեին, որ դիմակ կրելը պարտադիր էր նաև խուլ և համր մարդկանց համար, առայժմ նրանք կարող են դիմակ չկրել:

Հասարակությանը ամենահետաքրքրող և վերջին շրջանում ամենաքննարկվածը՝ դպրոցներում դիմակի կրման պարտադիր պահանջն է: Վարչական իրավախախտումների մասին օրենքը հստակ սահմանում է, որ վարչական պատասխանատվության կարող է ենթարկվել 16 տարին լրացած անձը, մեկ այլ հոդվածով էլ ամրագրված է, որ անձը վարչական պատասխանատվության կարող է ենթարկվել միայն իր կատարած արարքի համար:

ՀՀ նախկին ՄԻՊ Ռուբեն Մելիքյանից հետաքրքրվեցինք, եթե 6,10,15 տարեկան երեխան հրաժարվում է դիմակ կրել, ապա ինչպե՞ս են պատժում, եթե ինքը չի կարող ենթարկվել վարչական պատասխանատվության և ծնողն էլ չի կարող պատասխան տալ իր երեխայի արարքի համար:

Պատասխանեց, որ առահասարակ չգիտի իրավական ինչ ձև ունի այդ պահանջը.

«Ես չեմ հասկանում, թե ինչպես կարող ենք ստանալ դրական արդյունք ուսումնական պրոցեսից, երբ այսպիսի խիստ պահանջներ ենք դնում երեխաների առաջ: Խոսքը միայն դիմակ կրելը չէ՝ դասարանից դուրս չգալ, միմյանցից հեռավորություն պահպանել և այլն»:

Կարծում է, որ այս շարունակվող տենդենցը կբերի նրան, որ երեխաները աատելությամբ վերաբերվեն ուսումնական պրոցեսին:

Աննա Ավետիսյան

https://pressmedia.am/