Բժշկական կենտրոնի ցավակցությունը չի փոխի իրականությունը
Ծննդկանի մահվան դեպքի կապակցությամբ «Շենգավիթ» բժշկական կենտրոնի պաշտոնական հաղորդագրության համաձայն սեպտեմբերի 17-ին, ժամը 12:25-ին 30 ամյա ծննդկան Ա․Ս․ դիմել է «Շենգավիթ» ԲԿ:
Կինը նախկինում վիրահատվել է արտարգանդային հղիության կապակցությամբ: Հետվիրահատական շրջանում «Ցեֆտրիաքսիոն» հակաբիոտիկի նկատմամբ տարել է անաֆիլաքսային շոկ, որն ուղեկցվել է թոքերի այտուցով և սրտի կանգով: Առաջին անգամ կնոջը հաջողվել է փրկել: Հաշվի առնելով երկարատև անջուր շրջանը և հիվանդության անամնեզը կնոջը ներարկվել է այլ խմբի հակաբիոտիկ 500 մգ դեղաչափով՝ ըստ բժշկական պրոտոկոլի: Ներարկումից անմիջապես հետո հիվանդի վիճակը կտրուկ վատացել է: Գանգատվել է շնչահեղձության, խեղդոցի զգացումից, ունեցել է հազ, վերջույթների ցիանոզ, զարկերակային ճնշումն իջել է: Ձեռնարկված բոլոր հակաշոկային, վերակենդանացման միջոցառումները դրական արդյունք չեն տվել: Երեք անգամ գրանցվել է ծննդկանի սրտի կանգ, որը հնարավոր է եղել վերականգնել: Սակայն վերջին անգամ արձանագրվել է ծննդկանի կենսաբանական մահը:
«Շենգավիթ» բժշկական կենտրոնը ցավում է տեղի ունեցածի կապակցությամբ և հայտնում իր խորին ցավակցությունը ծննդկանի ընտանիքի անդամներին, հարազատներին և մտերիմներին և տեղեկացնում, որ երեխան ծնվել է առողջ՝ 3100 գրամ քաշով և 50 սմ հասակով:
Այս բժշկական հաստատությունում ծննդկանի մահվան առաջին դեպքը չէ, բայց, հետաքրքրին այն է, որ երկար-բարակ մանրամասներ ներկայացնելուց բացի, բժշկական կետրոնը չի պատասխանել մեկ պարզ հարցի, որ եթե ծննդկանը նախկինում հակաբիոտիկ ներարկելու պատճառով արդեն իսկ մեկ անգամ շոկ է տարել, ապա ինչո՞ւ անտիբիոտիկի հեթական չափաբաժինը ներարկելուց առաջ բժիշկներն այդ հարցին ուշադրություն չեն դարձրել և առանց լրացուցիչ թեստավորման որոշում են կայացրել նրան մեկ այլ խմբի հակաբիոտիկ ներարկել:
Սա խոսում է այն մասին, որ բժիշկները մարդկանց անհատական մոտեցում ցուցաբերելու փոխարեն շարունակում են ընդունված պրոտոկոլներով բուժել, ինչն էլ հանգեցնում է հերթական ողբերգական դեպքի:
Եվ, ամենակարևորը՝ մահացածի հարազատներին բուժհաստատության կողմից ցավակցություն հայտնելու փոխարեն լավ կլինի, որ հաստատությունում վերանայեն բուժանձնակազմի որակները, քանի որ այնտեղ գրանցված մահերի վիճակագրությունը գնալով մտահոգիչ է դառնում:
Անահիտ Սուքիասյան
1
2
3
4
5
3
4
5
2
3
4
5
