Ինչու՞ է դեռ լռում Արթուր Վանեցյանը
Վերլուծություն
Նախկին ԱԱԾ տնօրեն Արթուր Վանեցյանը հայտարարել էր, որ Արգիշտի Քյարամյանին ԱԱԾ տնօրեն նշանակելը արդեն իսկ ազգային անվտանգության խնդիր է: Եռաբուլուրում, լրագրողների հետ զրույցում ներկայիս ԱԱԾ տնօրեն Արգիշտի Քյարամյանն ասաց, որ Վանեցյանը թող մտածի այն մասին, որ իր պաշտոնավարման ժամանակ գաղտնալսել են իր՝ ԱԱԾ տնօրենի, ՀՔԾ պետի և վարչապետի խոսակցությունները: Լրագրողի հաջորդ հարցին ի պատասխան էլ նշեց, որ որևէ մեկը ապահովագրված չէ, որ կգաղտնալսեն հենց իրեն, քանի որ դեռ երկրում կան մեծ ֆինանսներ և հնարավորություններ ունեցող անձանց շրջանակ՝ չմանրամասնելով, թե ում ի նկատի ունի:
Վանեցյանի մերձավոր շրջանակը պատասխանեց Արգիշտի Քյարամյանին: «Հայրենիք» կուսակցության խորհրդի նախագահ, իրավապաշտպան Արսեն Բաբայանը խորհուրդ – հարց ուղեց իր իսկ խոսքով ԱԱԾ պետի պաշտոնը զբաղեցնող անձին. «ՔԿ նախագահը լրագրողների հետ ճեպազրույցում հայտարարել է, որ գաղտնալսման դեպքն ամբողջությամբ բացահայտված է: Հաշվի առնելով այն իրողությունը, որ իշխանությունը հանրությանն այդ գործով պատշաճ տեղեկություններ հայտնելու փոխարեն շարունակում է լկտիաբար շահարկել թեման, ապա Քյարամյանին խորհուրդ եմ տալիս պարզել, թե ինչպե՞ս ստացվեց, որ նախաքննության մարմինը գաղտնալսման գործով առանցքային վկայի (փաստացի կասկածյալ) ցուցմունքները պատշաճ չգնահատեց և որոշակի անձանց մեղադրանքներ չառաջադրեց»:
«Հանրային վերահսկողության կենտրոն» ՀԿ նախագահ Բաբկեն Հարությունյանն էլ նշել է, որ, իր գնահատմամբ, պադյեզդում գնդապետի կոչում ստացած ԱԱԾ պետը տառապում է անձի երկվությամբ, քանի որ և՛ նշում է` Վանեցյանի օրոք գաղտնալսում է եղել, և՛ հայտնել, որ որևէ մեկ ապահովագրված չէ. «Այսպիսի զավեշտալի հայտարարությամբ` Արգիշտին բոթում է, որ ինքն էլ է տառապում Նիկոլի սինդրոմով կամ նույնն է, թե անձի երկվությամբ , միաժամանակ փաստելով, որ իշխանության կողմից Վանեցյանի դեմ ունեցած միակ «զենքը» գաղտնալսման թեման դրոշակ դարձնելն է»: Չի մոռանում հիշեցնել, թե ինչ խնդիրների է բախվում ներկայիս ԱԱԾ-ն. «Պադյեզդի գնդապետ Արգիշտին ընկերներին և բարեկամներին ԱԱԾ-ում պաշտոնների նշանակելուց բացի, թող նախ մտածի իր «ղեկավարած» կառույցից պրոֆեսիոնալ կադրերի արտահոսքի և բազմաթիվ պատասխանատու հաստիքներում իր կողմից ղեկավարներ նշանակել չկարողանալու մասին, նոր ծածանի վաղուց մաշված գաղտնալսման դրոշակը: Փաստն այն է, որ Նիկոլը Վանեցյանի՝ նախկինում կատարած աշխատանքի արդյունքները ստորաբար վերագրում է իրեն և մինչ օրս էլ ներկայացնում հանրությանը` իբրև միայն իր ձեռքբերում»: Դե, Վանեցյանի ձեռքբերումներից մի քիչ էլ Քյարամյանին է մաղթել ու էլի ճարտասանական հարցեր. «Պարոն Արգիշտի, դե հիմա բացահայտիր թալանվածն ու թալանվողը, դե հիմա ԱԱԾ-ն դարձրու ժողովրդի ամենավստահելի կառույցը, բա ինչի չես կարողանում անել, բա ուր մնացին վարչապետիդ ասած թալանված միլիարդավոր դոլարները: Միրզոյան Արարատի ասած`Էս չեք արա։ Ի դեպ, գաղտնալսման գործը բացահայտվել է Վանեցյանի ԱԱԾ պետ եղած ժամանակ, և իշխանությունների կողմից անբարոյականություն է նրան մեղադրել գաղտնալսելու մեջ»:
Իսկ ի՞նչ է ակնարկում Վանեցյանի մտերիմ Բաբկեն Հարությունյանը: Եթե Արթուր Վանեցյանը բացահայտել էր այդ գործը իր պաշտոնավարման ընթացքում, ապա ինչու՞ չի խոսել այդ մասին, կամ, որ ամենազարմանալին է, ինչու՞ է լռում հիմա, հատկապես այն պարագայում, երբ բոլորը նրա պաշտոնավարման ընթացքում միակ թույլ օղակը դա են համարում և դուք էլ կարծում եք, թե հենց այս դրվագն է, որ իշխանությունը դարձրել է դրոշակ:
Աննա Ավետիսյան
1
2
3
4
5
1
2
3
4
1
2
