Վարդուհի Վարդերեսյանի հոգեհանգիստը՝ Կոնդի սրբ. Հովհաննես եկեղեցում (լուսանկարներ, տեսանյութ)

Կոնդի Սուրբ Հովհաննես եկեղեցում հայ մեծ դերասանուհի Վարդուհի Վարդերեսյանի հոգեհանգստյան արարողությանն այսօր բացի թատերական ու մշակույթի գործիչներից, թատերասերերից, ընկերներից ու գործընկերներից ներկա էին ՀՀ վարչապետ Հովիկ Աբրահամյանը, մշակույթի նախարար Հասմիկ Պողոսյանը, Երևանի քաղաքապետ Տարոն Մարգարյանը, պատգամավորներ, այդ թվում՝ Նիկոլ Փաշինյանը:

Սպասվում է նաև ՀՀ Նախագահ Սերժ Սարգսյանի այցը, ում անունից այսօր սգո ծաղկեպսակ է դրված Սուրբ Հովհաննես եկեղեցու պատին:

Tert.am-ի հետ զրույցում Վարդուհի Վարդերեսյանի հետ աշխատելու երկարամյա փորձ ունեցող, թատրոնի նախկին գեղարվեստական ղեկավար Վահե Շահվերդյանն ասաց.«Կարող եմ ասել, որ այսօր հայ թատրոնը որբացավ, որովհետև կյանքից և թատրոնից, հայ մշակույթից հեռացավ մեծ մայրը, մեծ տիկինը, որի տեղը դեռ երկար-երկար ժամանակ թափուր կմնա: Վարդուհի Վարդերեսյանը թատրոնի լեգենդ էր, Վարդուհի Վարդերեսյանը մեծերի շարունակությունն էր, և նա հեռանալով մեզնից՝ գնաց այն մյուս մեծերի մոտ, ովքեր 20-րդ դարի թե՛ առաջին, թե՛ երկրորդ կեսին հայ թատրոնի փառքն ու պատիվն էին»։

Վահե Շահվերդյանը հիշեց, թե ինչպես էին վիճում Վարդուհի Վարդերեսյանի հետ:

«Նա գալիս էր փորձի, պատրաստ, կամ զանգում էր՝ Վահե՛, ոչ այդպես չէ, իմ կարծիքով՝ այսպես պետք է լինի: Վարդուհի՛, առավոտյան փորձին կխոսենք, չէ՛, ես չեմ քնի»,-ժպտալով պատմեց Վահե Շահվերդյանը:

«Իմ կյանքի լավագույն շաբաթները, ամիսները եղել են հենց Վարդուհու հետ: Շատ բան կարող եմ հիշել, բայց իմ համար ամենատպավորիչը, երբ Դոստոևսկին էր, Գարսիա Լորկան էր... Տարօրինակ մի երևույթ էր»,- գնահատեց Երվանդ Ղազանչյանը:

Հիշեցնենք, որ ԽՍՀՄ, ՀԽՍՀ ժողովրդական արտիստ Վարդուհի Վարդերեսյանը հայտնի է թատրոնում կերտած հատկապես հետևյալ դերերով՝ Շիրվանզադեի «Պատվի համար»՝ Մարգարիտ, Չեխովի «Բալենու այգի»՝ Ռանևսկայա, Դյուրենմաթի «Ծեր տիկնոջ այցը»՝ Քլերի Ցախնասյան, Սարոյանի «Իմ սիրտը լեռներում»՝ Ջոնի, Շանթի «Հին աստվածներ»՝ Իշխանուհի և այլն։

Խաղացել է նաև արևմտահայ դերերում՝ «Պաղդասար Աղբար»՝ Անույշ և այլն։

Նկարահանվել է «Պատվի համար», «Մոր սիրտը», «Ճանապարհ դեպի կրկես», «Հայրիկ», «Կարինե» և այլ ֆիլմերում։ Հայաստանի Ազգային ռադիոյի ոսկե ֆոնդում ունի ավելի քան 100 ձայնագրություն։