Ինչպիսի՞ ձմեռ է սպասվում Հայաստանում. օդերևութաբանության կենտրոնը տեղեկացնում է

Ձմեռը տաք կլինի և տեղումնառատ. այսօր լրագրողների հետ հանդիպման ընթացքում հայտարարեց ՏԿԱԻՆ Հիդրոմետ ծառայության օդերևութաբանության կենտրոնի պետի տեղակալ Գագիկ Սուրենյանը:

Հայաստանում դեկտեմբերին օդի միջին ջերմաստիճանը նորմայից մեկ աստիճանով բարձր կլինի, հունվարին այն նույնպես բարձր կլինի մեկ աստիճանով, իսկ Շիրակում և Արարատյան դաշտում` մինչև երկու աստիճանով: Փետրվարին նույնպես օդի ջերմաստիճանը նորմայից բարձր կլինի մեկ աստիճանով, Շիրակում և Արարատյան դաշտում` կրկին մինչև երկու աստիճանով:

«Շիրակում, Կոտայքում, Գեղարքունիքում, Արագածոտնի և Վայոց ձորի լեռնային շրջաններում դեկտեմբեր ամսվա առաջին կեսին ցերեկային ժամերին հնարավոր է օդի ջերմաստիճանի բարձրացում` ցերեկը մինչև +7C, իսկ ամսվա երկրորդ կեսին կդիտվի օդի ջերմաստիճանի նվազում` գիշերը մինչև -23C: Լոռիում ամսվա առաջին կեսին ցերեկային ժամերին հնարավոր է օդի ջերմաստիճանի բարձրացում` ցերեկը մինչև +10C-ից մինչև +14C, ամսվա երկրորդ կեսին օդի ջերմաստիճանի նվազում` գիշերը մինչև -15C-ից մինչև -20C: Տավուշում ամսվա առաջին կեսին ցերեկային ժամերին հնարավոր է օդի ջերմաստիճանի բարձրացում` ցերեկը  +12C-ից մինչև +15C, ամսվա երկրորդ կեսին օդի ջերմաստիճանի նվազում` գիշերը մինչև -10C-15C»,- նշեց օդերևութաբանության կենտրոնի աշխատակիցը:

Եզրափակելով՝ ասաց. տաք ձմեռը չի ենթադրում գարնանային եղանակ և կոչ արեց գյուղացիներին անպայման այգեթաղ կատարել: