Նարիշկինը «մեսիջներ» է տալիս

Երեկ հայտի դարձավ, որ Մոսկվայում անհանգստությամբ են ընդունում Լեռնային Ղարաբաղի շուրջ լարվածության էսկալացիան, այս մասին բաց տեքստով ասել էր ՌԴ Արտաքին հետախուզական ծառայության տնօրեն Սերգեյ Նարիշկինը։ «Ադրբեջանի կողմից առաջին անգամ բացահայտ ու միանշանակ հանդես է գալիս Թուրքիան։ Ղարաբաղում բռնկված զինված դիմակայությունը մագնիսի պես ձգում է գրոհայինների տարբեր միջազգային ահաբեկչական կառույցներից։ Մեզ չի կարող չանհանգստացնել, որ Անդրկովկասը կարող է միջազգային ահաբեկչական կազմակերպությունների համար նոր ցատկահարթակ դառնալ, որտեղից գրոհայինները կարող են ներթափանցել Ադրբեջանի ու Հայաստանի հարևան պետություններ, այդ թվում՝ Ռուսաստան», – ասել է Նարիշկինը։

ԱՀԾ տեղեկություններով, հակամարտության գոտի ակտիվորեն ժամանում են Մերձավոր Արևելքում պատերազմող միջազգային ահաբեկչական խմբերի վարձկաններ, ինչպիսին են՝ Ջեբհաթ ան-Նուսրան, Ֆիքրաթ ալ-Համզան, Սուլթան Մուրադը, ինչպես նաև՝ ծայրահեղական քրդական խմբավորումներ։ Այստեղ տեղին է ընդգծել, որ խոսքը գնում է հարյուրավոր և անգամ հազարավոր ծայրահեղականների մասին, որոնք հույս ունեն փող աշխատել ղարաբաղյան նոր պատերազմում։ Կարող ենք եզրակացնել, որ Նարիշկինի հայտարարությունը նշանակում է, որ Ռուսաստանը կարող է հակաահաբեկչական գործողություն իրականացնել Ադրբեջանում՝ այդ կերպ թույլ չտալով ահաբեկիչներին մտնել իր տարածք։ Երբ Արտաքին հետախուզական ծառայության ղեկավարը պնդում է, որ կարող է ներթափանցում լինել, դա նշանակում է որոշակի կանխարգելիչ գործողություններ, որն իր հերթին պետք է սթափեցնի ռուսական կողմին բացահայտ վտանգի մասին, այլապես հետո հնարավոր է՝ ուշ լինի։

Ակնհայտ է, որ Ռուսաստանն անշուշտ հիանալի է հասկանում, որ Անկարան վարձկան-ահաբեկիչներին բերել է ոչ միայն Հայաստանի դեմ, այլ հեռու գնացող մարտավարական նկրտումներ է պլանավերել: Անկարան դրանց բերել է հարավկովկասյան տարածաշրջան Ռուսաստանի և, իհարկե, Իրանի դեմ հընթացս օգտագործելու նպատակով:

Հավելենք, որ պաշտոնական Թեհրանն իր հերթին պարբերաբար հանդես է գալիս հայտարարություններով և խոսում իր մտահոգությունների մասին՝ շեշտելով, որ չի հանդուրժի իր հյուսիսային սահմանին ահաբեկիչների առկայությունը:

Անի Եսայան

Pressmedia.am