Մզկիթը կանգուն է, իսկ Ղազանչեցոց եկեղեցու զանգերը չեն լսվում

Շուշիի Սուրբ Ղազանչեցոց եկեղեցու հրթիռակոծության լուրը ցնցեց ոչ միայն հայ, այլև աշխարհի բազմաթիվ քրիստոնյաների, ովքեր մեղադրեցին նմանօրինակ վայրագությունը:

ՊՆ ներկայացուցիչը նախ գրառման միջոցով հայտնեց, որ եկեղեցին թիրախավորողներից ամեն ինչ սպասելի է, իսկ օրվա ամփոփիչ ասուլիսին էլ հայտնեց, որ գործելաոճը, բնականաբար, անընդունելի քաղաքակիրթ երկրների համար, սակայն մեր թշնամին նույն է և մշտապես ձեռք է բարձրացրել Աստծո տաճարների վրա: Արցախի տեղեկատվական շտաբը հայտնել էր, որ 2 անգամ հրթիռակոծվեց եկեղեցին, իսկ Ադրբեջանը պաշտոնապես հերքեց լուրը: Շատ չուշացան հրապարակված կադրերը, իսկ սոցցանցերում՝ օրվա ամենաքննարկաված, ցավալի և անընդունելի դեպքն էր:

Վայրագության հերթական դրսևորմանը անդրադարձավ Ամենայն Հայոց կաթողիկոս Գարեգին Բ-ն. «Ադրբեջանը վերստին փաստեց Արցախը հայաթափելու և հայկական մշակութային ներկայությունը «ոչնչացնելու իր նենգ ծրագրի մասին՝ աջակից ունենալով ցեղասպան Թուրքիային և վերջինիս կողմից վարձած ահաբեկչական-ծայրահեղական զինյալներին»:

Ականատեսներից մեկն էլ այսպես է նկարագրել պայթյունի պահը. «Մեկ էլ տեսա` երկինքը սևացավ, նայեցի` 3 հատ սամալյոտ՝ կարկուտ անելով գնացին, երկուսը եկեղեցու կողքով ֆռռացին, մեկը` դեպի կանաչ եկեղեցի, մեկը` դեպի հիվանդանոց, էս մեկն էլ 3 անգամ կրակեց ու փախավ»: Տեր Անդրեաս քահանա Թավադյանը հիշեցրեց, որ մինչև հիմա այստեղ կանգուն է մզկիթը. - «Շենքը կանգնած է, վերանորոգեցին, և խնամքով պահում են մեր շուշեցիները, բայց պատասխանը, տեսանք՝ ինչպիսին է: Սա է իրենց ձեռագիրը, իսկ մերը` լրիվ հակառակը: Իհարկե, եկեղեցին նորից կվերանորոգվի, կգործի, մնում է, որ մենք հաղթենք և հաղթելու ենք»:

Արարքն ամբողջությամբ բնութագրել է Մայր Աթոռ Սուրբ Էջմիածնի տեղեկատվական համակարգի տարածած հաղորդագրության վերջնամասը. «Հավատավոր մարդկանց կրոնական սրբազան զգացմունքների այսօրինակ անարգումը և աղոթատների նպատակային թիրախավորումը ուղղակիորեն հակասում են բոլոր կրոնների ուսուցանած պատգամներին»: Հայն ու Արցախցին ակնկալում է նաև մյուս քրիստոնյա ժողովուրդների դատապարտողական խոսքը լսել և կոչ է անում, թույլ չտալ, որ անբարո թշնամին ձեռք բարձրացնի Աստծո տան վրա, որը վերականգնվելու է և այնտեղից կոչնակի ձայն է լսվելու:

Աննա Ավետիսյան

Pressmedia.am