ՆԱՏՕ-ն պետք է համագործակցի ՌԴ-ի հետ
Ուշադրության կենտրոնում
Միջազգային հանրությունը շարունակում է տատանվել, ապացույցների որոնումների մեջ է, թե արդյո՞ք վարձկաններն իրապես կռվում են Ադրբեջանում՝ ընդդեմ Արցախի: Ըստ էության, Թուրքիան շարունակում է հակամարտության գոտի տեղափոխել Սիրիայում և Լիբիայում կռված ահաբեկչական խմբավորումների գրոհայիններին: Տեռորիստական խմբավորումների ներքին տարբեր աղբյուրները վկայում են, որ Արցախի հետ սահմանին անցած 15 օրում ավելի քան 400 վարձկան է սպանվել։
Իրականում ինչպես է դա տեղի ունենում․ վարձկանները բերվում են Թուրքիայի Քիլիս քաղաք, որտեղ նրանց տալիս են համապատասխան հանձնարարականները, հետո միայն ուղարկում կոնկրետ թիրախային կետեր: Նշենք, որ վարձկանները Քիլիս են բերում հիմնականում Սիրիայի Իդլիբի նահանգից, որը տվյալ պահին Թուրքիայի հսկողության տակ է: Տեղեկությունների համաձայն՝ անցած մի քանի օրվա ընթացքում, վարձկանները Քիլիսում ենթարկվել են կտտանքների ու անմարդկային տանջանքների, քանի որ հրաժարվել են մեկնել Ադրբեջան, ցանկացել են վերադառնալ Սիրիա, սա տեղի է ունեցել այն ժամանակ, երբ նրանք իմացել են Արցախում իրենց մարտական ընկերների գլխին եկածը: Ըստ տարբեր հաշվարկների՝ արցախա-ադրբեջանական այս պատերազմի ընթացքում Թուրքիան 7 հազար վարձկանի է հետ կանչել Լիբիայից, որպեսզի նրանց հասցնի Ադրբեջան: Ակնհայտ է, որ նրանց համար Արցախը գերեզման է դառնալու, իսկ նրանք, ովքեր հասցրեցին փախչել, միանշանակ, նորից Սիրիա կամ Թուրքիա չի գնալու։
Ստեղծված իրավիճակում կարող ենք հստակ արձնագրել, որ ՆԱՏՕ-ի շահերից է բխում տվյալ փուլում համագործակցել Ռուսաստանի հետ, որպեսզի կարողանան կանխել ահաբեկչության վերջնական մուտքը Հին աշխարհամաս: ՆԱՏՕ-ն Թուրքիային աջակցելով՝ Հարավային Կովկասը վերածում է վտանգավոր օջախի: Եթե անվտանգությունն այստեղ դառնա փխրուն, դոմինոյի էֆեկտով մտնելու է եվրոպական ազդեցության գոտիներ, ինչը, փաստացի չի բխում գլոբալ անվտանգության շահերից:
Անի Կիրակոսյան
1
2
3
4
5
2
3
4
5
1
2
3
4
5
