Արդյո՞ք մեզ սահմանի մահերը բավարար չեն

Երկրում պատերազմ է երկու ճակատով՝ կորոնավիրուսային և ռազմական: ՀՀ-ում միաժամանակ հայտարարված է կարանտին և ռազմական դրություն: Պետական կառույցները, պատկան մարմինները և, հատկապես, առողջապահության ոլորտը միաժամանակ պայքարում են երկու ճակատով:

ՀՀ-ում մեկ օրում գրանցվել է կորանավիրուսի 1058 նոր դեպք: Ընդհանուր վարակվածների թիվը` 58624 է: Այս պահին կա 10561 վարակակիր: Այս քանակն էր նաև հուլիս ամսին, երբ առողջապահական մի քանի հաստատություններ, հյուրանոցներ և հյուրատներ, միաժամանակ զբաղված էին միայն կորոնավիրուսով վարակվածների բուժմամբ: Կրկին ու կրկին հորդորում էին դիմակ կրել, պահել սոցիալական հեռավորություն, հաճախակի ախտահանել ձեռքերը: Այս երեք կանոնների պահպանման արդյունքում վիրուսը արդեն սկսել էր նահանջ ապրել:

Պատերազմական իրավիճակում բժշկական ռեսուրսի մեծ մասն ուղղված է վիրավորներին՝ հայրենիքի պաշտպաններին օգնություն ցուցաբերելով, ուստի պատկան մարմինները, քաղաքացիները և այս կամ այն ոլորտի ներկայացուցիչները, ում խոսքը ընդունելի է հասարակության մեծ մասի համար, կոչ էին անում և, նույնիսկ, խնդրում էին հանուն վիրավորների՝ առաջամարտիկների առողջության, կրել դիմակ: Այդ կերպ իրապես փրկվում են կյանքեր: Որոշ բուժաշխատողներ նշում են, որ իրենց կոլոգաները այևս չեն կարողանում և իրենց սուբյեկտիվ կարծիքով նրանք կարող են կորցնել իրենց կյանքը գերհոգնածության պատճառով: Մահացածների թիվն էլ կրկին նմանվում է պիկին և պարզ հարց է առաջանում «Արդյո՞ք մեզ սահմանի մահերը բավարար չեն»: Միայն այսօր մահացել է 10 քաղաքացի, ընդհանուր մահերի թիվը հասնում է 1350-ի, որից 311-ը՝ այլ պատճառներից: Երբ վարչապետ Նիկոլ Փաշինյանը մի պահ դժգոհում էր քաղաքացիների անպատասխանատվությունից, նաև մեղադրում վիրուսի տարածվածության մեջ, կարծես միտքը չէր ընկալվում, իսկ ներկայումս այս թվերը նույն անպատասխանտվության արդյունքն է:

Վիրուսի տարածվածությունը կանխելու համար ոլորտը պայքարում է հնարավոր բոլոր եղանակներով: Օրերս առողջապահության նախարար Արսեն Թորոսյանը բաց նամակ էր գրել ԱՀԿ տնօրենին՝ ներկայացնելով իրավիճակը: Կրկին չեն աշխատի ուսումնական հաստատությունները՝ այդ կերպ սկսվում է տնտեսական նոր ճգնաժամ: Վստահ ենք, որ #Հաղթելու ենք և դրա համար պետք է յուրաքանչյուրը քայլ անի:

Աննա Ավետիսյան

Pressmedia.am