Արտաքին գործերի նախարար Էդվարդ Նալբանդյանն առաջիկայում կայցելի Սիրիա

ՀՀ վարչապետի հանձնարարությամբ Արտաքին գործերի նախարար Էդվարդ Նալբանդյանն առաջիկայում կայցելի Սիրիա՝ ծանոթանալու իրավիճակին, տեղում ճշտելու սիրիահայերի խնդիրներն ու կարիքները: Սիրիայում կլինի նաև պատգամավորների խումբ: Մայիսի 21-ի կառավարության նիստում ՀՀ վարչապետ Հովիկ Աբրահամյանն առաջարկեց համապատասխան նախարարություններին կոորդինացնել աշխատանքները և սիրիահայերին ցուցաբերել առավելագույն աջակցություն:

ՀՀ սփյուռքի նախարարությունը դիվանագիտական ծառայությունների և Հալեպում գործող հայկական կազմակերպությունների հետ ամենօրյա կապի մեջ է: Հրանուշ Հակոբյանի խոսքով՝ իրենք պայմանավորվել են նաև սփյուռքյան շատ կազմակերպությունների հետ՝ Սիրիայում ապրող մեր հայրենակիցներին օգնություն ցուցաբերելու համար: «Ցավոք, Հալեպում իրավիճակը վտանգվում է: Վերջին մեկուկես ամիսներին Հալեպում զինյալների թիրախում են նաև քրիստոնեական շրջանները, ինչի հետևանքով ավերվեց Հալեպի Սրբոց Նահատակաց եեղեցին: Զինյալները պայմաններ են թելադրում մեր հայրենակիցներին, որպեսզի նրանք արագ հեռանան տարածքից: Խնդիրները երեք ուղղությամբ են զարգանում. հալեպահայերի մի մասը տեղափոխվում են Սիրիայի առավել անվտանգ տարածքներ, մի մասը դուրս է գալիս երկրից, իսկ մյուս մասը շարունակում է Հալեպում ապրել: Ներկայում խուճապային տրամադրություններն անցել են, վերակագնվել է ջրի և էլեկտրաէներգիայի մատակարարումը»,- ասաց Հակոբյանը:
Նրա տեղեկացմամբ՝ վերջին շրջանում Հալեպից Հայաստան է ժամանել մոտ 200 մարդ: ՀՀ սփյուռքի նախարարությունը գումարել է միջգերատեսչական հանձնաժողովի նիստ` հասկանալու, թե ինչ կարող են անել և ինչպես աջակցել մեր հայրենակիցներին: Հրանուշ Հակոբյանը հանդիպել է նաև բարեգործական կառույցների, ՄԱԿ-ի փախստականների հանձնակատարի հետ, ճշտել, թե ինչ հնարավորություն կա սիրիահայերին օժանդակություն ցուցաբերելու համար:

«Առաջին խնդիրը բնակարանի հարցն է, որովհետև նրանք հիմնականում ցանկանում են հաստատվել Երևանում: Բնակվարձի հետ կապված խնդիրը ՄԱԿ-ի գրասենյակի և բարեգործական կառույցների օժանդակությամբ լուծվել են: Էկոնոմիկայի նախարարության հետ այժմ ակտիվացնում ենք փոքր բիզնեսի կազմակերպմանն օգնելու գործողությունները, որպեսզի նրանց համապատասխան վարկեր տրամադրվեն: Խնդրում ենք գործատուներին, որ առավել հեշտությամբ սիրիահայերին ընդունեն աշխատանքի»,- ասաց Սփյուռքի նախարարը:

Հրանուշ Հակոբյանի խոսքով՝ սիրիահայերի մոտ առկա են նաև հոգեբանական և առողջական այլ խնդիրներ: ՀՀ առողջապահության նախարար Արմեն Մուրադյանի հետ քննարկվել է խնդիրը և սիրիահայերին օգնություն կցուցաբերվի պետպատվերի շրջանակում: Միաժամանակ, նախարարը նշեց, որ սիրիահայ երեխաների թիվը Հայաստանում ևս գնալով ավելանում է, և կառավարությունը կկարողանա 300-ից ավելի երեխաների ամառային հանգիստը կազմակերպել ճամբարներում: