ԱՄՆ-ն մատնանշել է ՆԱՏՕ-ի նկատմամբ Թուրքիայի պարտավորությունների խախտումը

Պենտագոնի պաշտոնական ներկայացուցիչ Ջոնաթան Հոֆմանը հայտարարել է, որ ռուսական Ս-400 զենիթահրթիռային համակարգի շահագործումը չի համապատասխանում Թուրքիայի՝ որպես ԱՄՆ-ի դաշնակցի և ՆԱՏՕ-ի անդամի պարտավորություններին: Լրագրող Անտոն Նիկիտինի հեղինակած հոդվածը վերցրել ենք «Взгляд» թերթի կայքից:

Ինչպես շեշտել է Հոֆմանը, Պենտագոնը տեղյակ է «Թուրքիայի կողմից Ս-400-ի հնարավոր փորձարկումների մասին հաղորդագրություններից»:

-Եթե դա ճիշտ է, նախարարությունը վճռականապես դատապարտում է փորձարկումները: Մենք առավելագույնս հստակ էինք՝ շահագործման հանձնված Ս-400 համակարգը չի համապատասխանում Թուրքիայի՝ որպես ԱՄՆ-ի դաշնակցի և ՆԱՏՕ-ի անդամի պարտավորություններին, - Պենտագոնի ներկայացուցչի խոսքերը մեջբերել է «ТАСС»-ը:

-Մենք դեմ ենք Թուրքիայի կողմից այդ համակարգի գնմանը և խորապես մտահոգված ենք Թուրքիայի կողմից դրա շահագործման մասին տեղեկություններով: Այն պետք չէ ընդգրկել սպառազինության մեջ. դա հղի է անվտանգության ոլորտում մեր հարաբերությունների համար լուրջ հետևանքներով: Թուրքիային արդեն հեռացրել են (հինգերորդ սերնդի ամերիկյան կործանիչների արտադրության) F-35 ծրագրից, իսկ Ս-400-ը շարունակում է խոչընդոտ մնալ այլ ոլորտներում երկկողմանի հարաբերությունների առաջընթացի համար, - նշել է Ամերիկայի պաշտպանության գերատեսչության ներկայացուցիչը:

Ավելի վաղ ԱՄՆ-ի Պետական դեպարտամենտը Թուրքիային սպառնացել է «լուրջ հետևանքներով»՝ Ս-400 ռուսական զենիթահրթիռային համակարգի շահագործման դեպքում:

Ռուզան Հովհաննիսյան

Pressmedia.am