Կապահովվի երկրի 46 դպրոցի սեյսմիկ անվտանգությունը

Ուշադրության կենտրոնում 2 Դեկտեմբեր, 2015 21:07

Կարեն Մկոյանը ֆեյսբուքյան իր էջում գրում է.

Վաղվա նիստում կառավարությունը մտադիր է հաստատել պետական հանրակրթական դպրոցների սեյսմիկ անվտանգության բարելավման 2015- 2030թթ. ծրագրից բխող 2015- 2020թթ. միջոցառումների ծրագիրը: Այս ժամանակաշրջանում Ասիական զարգացման բանկի նույնանուն ծրագրով նախատեսված 107 մլն ԱՄՆ դոլարով կուժեղացվի և նոր կկառուցվի 46 դպրոց: Որոշման ընդունումը կնպաստի իրականացվելիք ներդրումային ծրագրի արդյունավետ կազմակերպմանը և ծրագրի իրականացման գործընթացումներգրավված պետական կառույցների աշխատանքի համակարգմանը:

Իրավական ակտը մշակել է ՀՀ միջազգային տնտեսական ինտեգրման և բարեփոխման նախարարության աշխատակազմը` ՀՀ տարածքային կառավարման և արտակարգ իրավիճակների նախարարության, ՀՀ քաղաքաշինության նախարարության, ՀՀ կրթության և գիտության նախարարության և Տարածքային զարգացման հիմնադրամի մասնակցությամբ:

Ըստ նպատակից բխող միջոցառումների ծրագրի հաստատվելու է 46 գերակա շենքերի ցանկը, ապահովվելու են դրանց նախագծերի մշակման և շինարարության իրականացման համար անհրաժեշտ ելակետային փաստաթղթերը, այնուհետև մշակվելու են բուն նախագծերը, կատարվելու են շինմոնտաժային աշխատանքները: Յուրաքանչյուր դպրոցի համար ստեղծվելու է արտակարգ իրավիճակի արձագանքման գործողությունների ծրագիր, ընդգրկված համայնքներում իրազեկման քարոզարշավ է իրականացվելու:

Բացի այդ, ազգային դիտացանցի սեյսմիկ մոնիթորինգի համար դիտակետերն արդիականացնելու նպատակով տրամադրվելու են սարքավորումներ, վերապատրաստվելու են դիտակետերի աշխատակիցները, կազմվելու է ՀՀ տարածքի երկարաժամկետ սեյսմիկ վտանգի 1:500000 մասշտաբի հավանակային գնահատման նոր քարտեզ, գնահատվելու են 46 դպրոցների համայնքների սեյսմիկ ռիսկերը և իրականացվելու են բազմաթիվ այլ միջոցառումներ:
Արդյունքում` աշխատանքի ավարտին, երկիրն ունենալու է ուժեղացված և նորակառույց 46 դպրոցի անվտանգ շենք, որոնք համապատասխանելու են միջազգային բոլոր չափանիշներին: