COVID-19-ով վարակման դեպքերը 40 տարեկանից ցածր մարդկանց շրջանում նվազում են, իսկ տարեցների շրջանում` աճում

Մեծ Բրիտանիայում COVID-19-ով վարակման դեպքերը 40 տարեկանից ցածր մարդկանց շրջանում նվազում են, սակայն տարեցների շրջանում աճում են: 60 տարեկանից բարձր մարդիկ այժմ վարակման ամենաբարձր ռիսկային գոտում են, վկայում է Public Health England-ի վիճակագրությունը:

Ինչպես նշում է The Daily Mail-ը, Մեծ Բրիտանիայում դեռահասների շրջանում վարակման դեպքերի թիվը նվազել է 21 տոկոսով: Դպրոցականների եւ ուսանողների շրջանում վարակման դեպքերի թիվը եւս նվազում է: Սակայն միջին տարիքի եւ տարեղ քաղաքացիների շրջանում վարակման հաճախականությունը շարունակում է աճել: Ամենաբարձր ռիսկը մնում է 60-ից բարձր տարիքի մարդկանց շրջանում. մեկ շաբաթվա ընթացքում այս խմբում վարակվածությունն աճել է 6 տոկոսով: 60-ից բարձր տարիքի մարդիկ նույնպես COVID-19-ից մահվան ռիսկային գոտում են, ուստի շատ կարեւոր է միջոցներ ձեռնարկել այս տարիքային խմբում դեպքերը նվազեցնելու համար:

Չնայած Անգլիայում կորոնավիրուսի երկրորդ ալիքը սկսվել էր երեխաների եւ դեռահասների շրջանում վարակման դեպքերի կտրուկ աճով, այժմ, ըստ մասնագետների, այն անցել է տարեց մարդկանց շրջան, եւ սա հատկապես խնդրահարույց է, քանի որ նրանք, ամենայն հավանականությամբ, կհայտնվեն այժմ գերծանրաբեռնված հիվանդանոցներում: Անցյալ շաբաթվա ընթացքում Անգլիայում թեստերի դրական արդյունքները հասել է զգալի 10 տոկոս ցուցանիշի: Այլ կերպ ասած, COVID-19-ի ախտորոշման յուրաքանչյուր տասներորդ թեստի արդյունքը դրական է, իսկ գարնան համեմատ երկրում թեստավորման ծավալը տասնապատկվել է:

Աղբյուր