Պատերազմական իրավիճակը ստիպում է սահմանափակել խոսքի ազատությունը երկրում․ Տիգրան Հակոբյան

Պատերազմական իրավիճակը ստիպում է սահմանափակել խոսքի ազատությունը երկրում, այսօր լրագրողներին ասաց ՀՌՀ նախագահ Տիգրան Հակոբյանը։ «Ոչ միայն ռազմական դրության, այլ ընդհանրապես ճգնաժամային դրությունների ժամանակ մենք պետք է հասկանանք, թե առաջնահերթությունները որոնք են՝ մեր խոսքի իրավունքի կիրառումը, թե՞ պետական շահերը։ Ամբողջ աշխարհում այդպես է, դուք էլ լավ գիտեք։ Ռազմական գործողությունների ժամանակ սահմանափակվում է խոսքի իրավունքը և այլ քաղաքացիների իրավունքները»,- ասաց նա։

Նա անդրադարձավ հարցին, որ այս խնդրով Մարդու իրավունքների պաշտպանը դիմել է Սահմանադրական դատարան։

«Ինչո՞ւ է դիմել, տիկին Սեյրանյանի դիմումի հիման վրա, այսինքն՝ այն պրակտիկայի հիման վրա, որ այդպիսի խախտումներ և պատիժներ եղել են։ Մեզ դա չի վերաբերում, որովհետև մեր տեսալսողական մեդիայի բնագավառում այդպիսի բան դեռ չի եղել։ Օրենքում այդ փոփոխությունն արեցին, որ լիցենզավորված տեսալսողական մեդիայի առումով պատժողը հանձնաժողովն է։ Ես կարծում եմ՝ եթե այդպիսի մասնագիտացված մարմին ստեղծված լիներ ընդհանրապես բոլոր մեդիաների համար, այս խնդիրը չէր լինի։ Ի վերջո ոստիկանությունը մասնագիտացված մարմին չէ, չկան այն չափորոշիչները, որով ինքը պետք է որոշում ընդունի և պատժի։ Տասնյակ այդպիսի դեպքեր կան, երբ ոչ մասնագիտական մարմինը զբաղվում է մասնագիտական խնդիրներով»,- հավելեց նա։

Ավելին․․․