Ոստիկանությունը մասնագիտացված կառույց չէ, որ որոշի, թե որ դեպքում է օրենքը խախտվել. Տիգրան Հակոբյան
Ուշադրության կենտրոնում
ՀՌԱՀ նախագահ Տիգրան Հակոբյանն անդրադառնալով տեղեկատվական դաշտում առկա խախտումներին pressmedia.am-ի հետ զրույցում նշեց, որ իր ղեկավարած հանձնաժողովը զբաղվում է միայն հեռուստա և ռադիո ընկերությունների հեռարձակումների մոնիթորինգով: Եվ այդ դաշտում այս պահին խախտումներ չկան: «Ներկայում բոլոր խախտումները, որոնք արձանագրվում են վերաբերում են տպագիր և էլեկտրոնային մամուլին, որը մեր ուսումնասիրության տիրույթից դուրս է: Ինչ վերաբերում է մեր վերահսկողության տիրույթում գտնվող լրատվամիոցներին, ապա բոլորն էլ հասկանում են, որ եթե այս փուլում օրենք խախտեն, ապա, օրենքի ուժով ապագայում կարող է այլևս լիցենզիա չկարողանան ստանալ: Գուցե հենց դա էլ զսպող դեր է կատարում, որի արդյունքում այս պահին որևէ խախտում չունենք: Բայց մենք ոչ թե պատժիչ գործողություններ իրականացնելու ճանապարհով ենք գնում, այլ փորձում ենք համագործակցել ընկերությունների հետ, քանի որ հնարավոր է իրենց կամքից անկախ որոշ խախտում թույլ տան և, նույնիսկ՝ չնկատեն: Այսինքն, մենք ավելի շատ կանխարգելիչ քայլեր ենք իրականացնում, քանի որ բոլորս էլ հասկանում ենք, որ լարված իրավիճակում մարդիկ 24 ժամ աշխատում են և կարող են նաև սխալվել»,- ասաց Տ. Հակոբյանը: Տ. Հակոբյանը հավելեց նաև, որ պատերազմական իրավիճակում բոլորը ստիպված են ենթարկվել իրավիճակով պայմանավորված սահմանափակումներին: Նման մոտեցում է ցուցաբերվում նաև ճգնաժամային իրավիճակներում: «Սա նորություն չէ: Սա դասական մոտեցում է: Եթե ՀՌԱՀ-ի նման հանձնաժողով գործեր նաև օնլայն հարթակների համար, ապա մենք այսօր որևէ խնդիր չէինք ունենա, քանի որ ոստիկանությունը մասնագիտացված կառույց չէ, որպեսզի որոշի, թե որ դեպքում է օրենքը խախտվել: Սա այլ խնդիր է, որը պետք է լուծվի»,- ասաց Տ. Հակոբյանը:
Սերինե Բադալյան
1
2
3
4
5
5
4
