Չնայած ճնշումներին, կլինեն այլ հեռացողներ․ «Փաստ»

«Փաստ» օրաթերթը գրում է

«Իմ քայլը» խմբակցության մի քանի պատգամավոր արդեն իսկ խոստովանել է, որ օրերս խմբակցության անունից տարածված հայտարարությունից տեղյակ չեն եղել, իսկ եթե տեղեկացվել են, ապա միայն հայտարարության առաջին մասից:

«Փաստ» թերթի տեղեկություններով, սա լուրջ դժգոհություններ է առաջացրել խմբակցությունում, որի անդամների մի զգալի մասն առանց այդ էլ, մեղմ ասած, գոհ չէ, որ ստիպված է խուսափել հանրության մեջ դուրս գալուց, մարդկանց աչքերի մեջ նայելուց, քանզի փաստացի պատասխանատվություն ստանձնեց Փաշինյանի ստորագրածի համար: Այս մասին իմանալով՝ վերջինիս կոմղից ամեն ջանք գործադրվում է, որ խմբակցությունից նոր հեռացողներ չլինեն: Մասնավորաբար, մեր տեղեկություններով, խմբակցությունից հեռացած Վարդան Աթաբեկյանի տան մոտ գիշերը «իմքայլական» որոշ պատգամավորների «հավաքվելն» առաջին հերթին «մեսիջ» էր մյուսներին, որ չհամարձակվեն «թռնել»: Զուգահեռ անհավանական մեծ թափով միացվել է «ֆեյքերի ֆաբրիկայի» հոսքագիծը, որպեսզի անվանարկվեն նման քայլ անողները և ընդհանրապես փորձեն արդարացնել ստորագրված կապիտուլյացիոն համաձայնությունը:

Մյուս կողմից՝ մեր աղբյուրների փոխանցմամբ, որոշ պատգամավորների կողմից կլինեն «երդման տեքստեր», որ երբեք թիմը չեն լքի, ինչպես նաև «կոլեկտիվ դատապարտումների» տեքստեր հեռացողների հասցեին: Սակայն, ըստ նույն աղբյուրների, կլինեն պատգամավորներ ու գործադիր իշխանության ներկայացուցիչներ, որոնք ի վերջո որոշում կկայացնեն ու կհեռանան: Ի դեպ, գործադիրում նման շարժ արդեն նկատելի է, թեպետ ոչ ամենավերին էշելոններում: Մեր տեղեկություններով, չնայած իրականացվող ճնշումներին, սա մեծ թափ է ստանալու, եթե այս վիճակը մի քանի օր էլ շարունակվի:

Մանրամասները՝ «Փաստ» օրաթերթի այսօրվա համարում