Երբ է իրականում առաջադրվել Շուշին հանձնելու պայմանը. տեսանյութ

Շատ են ասում, թե Շուշին ուղղակի հանձնվել է: Ես կարդացի Արցախի նախագահի գրառումն այն մասին, որ Շուշիում հարյուրից ավել մեր զինվորների մարմիններ են հայտնաբերվել: Եթե Շուշին հանձնվել է, այդ զինվորներն ո՞ւմ հրամանով են կռվել կամ՝ ինչի՞ համար են կռվել: Կային հայտարարություններ, թե կան կոնկրետ տվյալներ, անուններ, ովքեր պատրաստ են վկայել, որ Շուշիի մասով դավադիր որոշում է կայացվել: Ես ուզում եմ ասել, որ իրավապահները հրավիրել են այդ հայտարարության հեղինակին, փորձել են կոնկրետ տեղեկություններ ստանալ, թե ովքեր են դավադիրները, ինչ դավադրության մասին է խոսքը, ինչպես է դա տեղի ունեցել: Ինչքանով ես տեղյակ եմ, այդ հայտարարության հեղինակը խուսափել կոնկրետ պատասխան տալ: Այստեղից  եզրակացությունը հետևյալն է, եթե կա դավաճանություն և ինչ-որ մեկը հայտարարում է, որ ունի կոնկրետ տեղեկատվություն, հետո իրավապահներին հրաժարվում է կոնկրետ տեղեկատվություն տալ, ստացվում է՝ մասնակցություն դավաճանությանը: Եթե չի վստահում իրավապահներին, թող հրապարակային հայտարարի, թե ինչ է տեղի ունեցել: Այս մասին մամուլի ասուլիսի ժամանակ հայտարարեց Նիկոլ Փաշինյանը:

Փաշինյանը խոսեց նաև այն մասին, թե կարող էինք արդյո՞ք խուսափել պատերազմից. «Այո, կարող էինք, եթե համաձայնվեինք Ադրբեջանին հանձնել 7 շրջաններն ու Շուշին: Բայց արդյո՞ք դա էր այն քաղաքականությունը, որը մենք ուզում էինք վարել: Ոչ, դա չէր: Արցախի ՊԲ-ն, Հայաստանի կառավարությունն ու մեր ԶՈւ-ն որոշեցին ընդունել մարտահրավերը: Ցավոք, դա չբերեց այն արդյունքներին, որը մենք կցանկանայինք: Բայց նաև այն պատճառով, որ պարտության անխուսափելիության խոսույթն առաջին օրվանից ներկա է եղել առաջնագծում:

Այսօր քաղաքական գործիչները, ովքեր պատերազմի առաջին օրից կոչ էին անում պատերազմը կանգնեցնելու գնով հանձնել տարածքներ, նույն բանի համար ՀՀ կառավարությանը մեղադրում են դավաճանության մեջ: Շուտի և ուշի տարբերությունն, ըստ էության, բովանդակային չկա: Այո, Շուշիի հանձնման պայմանն առաջադրվել է, եթե ոչ ի սկզբանե, համենայնդեպս՝ սկզբնական շրջանում: Քանի դեռ կար հնարավորություն այդ ամեն ինչը ՊԲ-ն, ՀՀ ԶՈւ ԳՇ-ն որոշել է կռիվ տալ մինչև վերջ, ինչն էլ արվել է մինչև վերջին վայրկյանը: Ցավոք մենք չենք կարողացել այդ խնդիրը լուծել: Դրա պատասխանատուն մենք ենք, որովհետև վերջին 2,5 տարվա ընթացքում չենք կարողացել լրացնել տասնյակ տարիներով չարվածը: Այո, դրա համար պատասխանատու ենք»:

Հետաքրքիր է, որ Փաշինյանը նախ ասում է, որ պատերազմից հնարավոր կլիներ խուսափել, եթե հանձնեինք 7 շրջաններն ու Շուշին, սակայն հետո նշում է, որ Շուշիի մասով պայմանն առաջադրվել է, եթե ոչ ի սկզբանե, համենայնդեպս՝ սկզբնական շրջանում: