Փաշինյանը չունի աջակցության աղբյուր
Վերլուծություն
Այսօր գրեթե չկա քաղաքական ուժ, որը չի պահանջում վարչապետի հրաժարականը, իսկ Նիկոլ Փաշինյանը պատրաստվում է արտահերթ խորհրդարանական ընտրությունների։ Դրանք պետք է կայանան առաջիկա ամիսներին։ Նիկոլ Փաշինյանի կարծիքով, նոր ընտրություններով հետպատերազմյան մթնոլորտը կլիցքաթափվի, կհայտարարի, որ կատարում է ընդդիմադիրների պահանջը։
Իրականում այստեղ կա մի «բայց»․ ընդդիմության առաջարկած «ճանապարհային քարտեզի» համաձայն, Փաշինյանը հրաժարական է տալիս, վարչապետի պաշտոնում նշանակվում է քաղաքական դաշտի կոնսենսուսային թեկնածու, ընդ որում՝ այնպիսի մարդ, ով չպետք է հավակնի մասնակցել արտահերթ ընտրություններին, որպեսզի ստեղծված լարված իրավիճակում կարողանա դառնալ ազատ, արդար ընտրությունների արբիտր։ Իսկ Նիկոլ Փաշինյանի վարչապետության ներքո անցկացվելիք ընտրություններն արդեն իսկ ենթադրում են վարչական լծակի օգտագործում, անհավասար պայմաններ եւ արդյունքում կանխատեսելի ընտրություն՝ իշխանության հաղթանակով։
Եթե նույնիսկ ընդունենք, որ Նիկոլ Փաշինյանն իշխանական լծակները չի օգտագործի ընտրապայքարում, միևնույն է՝ իներցիայով, վախով պայմանավորված՝ պետական աշխատողները քվեարկելու են օրվա իշխանության օգտին։ Հենց այս պատճառով էլ Նիկոլ Փաշինյանն ամեն ինչ անում է՝ մի քանի ամիս էլ ձգելու և իր վարչապետությամբ ընտրություններ անցկացնելու համար։
Կարծում ենք՝ պատահական չէ, որ Դանիել Իոաննիսյանը, ով 2018 թվականից մասնակցում է Ընտրական օրենսգրքի բարեփոխումների գործընթացին, մի քանի օր առաջ սոցցանցերում տեղեկացրեց, որ «արդեն մի քանի օր է, ինչ վերսկսվել են Ընտրական օրենսգրքի քննարկումները: Աշխատանքներն ընթանում են նախապատերազմականից ավելի ինտենսիվ կերպով»։
Փաստացի Նիկոլն իր համար հերթական համար հարմար պլացդարմն է ստեղծում՝ սեփական իշխանության համար երկրորդ կյանք ապահովելու նպատակով։ Այսօր սակայն քաղաքական դաշտում և ընդհանուր «ռասկլադին» հետհայացք գցելով պարզ է դառնում, որ նա չունի ոչ մի տիպի քաղաքական հենարան և իր իշխանության քաղաքական կյանքը երկարացնելու հնարավորություն։ Նման իրավիճակ է տիրում և ներքաղաքական և միջազգային հարթակներում, քանի որ Փաշինյանն այսօր չունի աջակցության որևէ աղբյուր։
Ըստ ամենայնի կարող ենք եզրակացնել, որ այսօր տեղի ունեցող զարգացումները և Փաշինյանի պարբերական բնույթ ստացող ջղաձգումները, խոսում են այն մասին, որ նա ուղղակի տարբերակ է մտածում անձի փրկության, ոչ թե թիմի։ Եվ իր բնավորությանը բնոոշ, շատ կարճ ժամանակ անց, նա «փուռը» կտա թիմակիցներին։
Անի Ավագյան
1
2
3
4
5
1
2
3
4
5
1
2
3
4
5
