Ռուս խաղաղապահները փոշմանե՞լ են․ սողացող պատերազմը շարունակվում է

Lragir.am-ը գրում է.

Հադրութի եւ Շուշիի շրջանների հայկական վերահսկողության բնակավայրերի վրա թուրքական հարձակումները չեղարկել են եռակողմ համաձայնագիրը որպես այդպիսին, թեեւ դրա միայն անունն է եռակողմ, իրականության մեջ՝ Հայաստանի դեմ համաձայնություն, հայկական խամաճիկ իշխանության պայմաններում։ Թեեւ ռուս խաղաղապահները հայտարարել են, որ դա առաջին խախտումն էր, իրականում խախտումները սկսել են անմիջապես հայտարարությունն ընդունելու օրը, բացառապես՝ հայերի դեմ։

Վարչապետն ասում է, թե հայկական զինուժը չի կարող իրեն այնպես պահել, ինչպես ադրբեջանականը, նախեւառաջ ռուս խաղաղապահներին անհարմար դրության մեջ չդնելու համար։ Հադրութի հայկական բնագծերի դեմ հարձակման արդյունքում վիրավորվել ու անհետ կորած են տասնյակ հայ զինծառայողներ, ընդ որում, այդ գործողությունները տեղի են ունեցել ռուս խաղաղապահների ժամանումից եւ այսպես քարտեզը փոխելուց հետո, երբ այդ բնակավայրերը հայտնվել են նրանց այսպես ասած պատասխանատվության գոտում։

Վարչապետի անպատիվ հայտարարությունը դեռ իր գնահատականը կստանա, ընդհանրապես՝ հայկական իշխանության հանցավոր անգործությունն ու անզորությունը։

Թուրքերը հարձակվել են նաեւ Շուշիի հայկական երկու գյուղերի վրա եւ շրջափակման մեջ առել։ Ինչպես նշել է Մեծ շենի գյուղապետը, «Կանանց մի կերպ հանել են գյուղերից՝ ռուսների միջամտությամբ։ Բայց թույլատրողը ադրբեջանցին է։ Ռուսը ասում է՝ ադրբեջանցին թույլ չի տալիս, ֆսյո։ Եթե թույլ են տալիս, մարդկանց հանում են, եթե ոչ, ոչ։ Շրջափակումն այն է, որ ադրբեջանցիները ռուսների հետ կանգնած են, բայց թե վերջում ինչ է սպասվում, այ դա չգիտենք»։

Արցախի մարդու իրավունքների պաշտպանն ասում է, որ Պաշտպանության բանակի և ՌԴ խաղաղապահ զորակազմի որոշ ստորաբաժանումներ տեղում վերահսկում են իրավիճակը, ինչի շնորհիվ որևէ միջադեպ չի արձանագրվել: Սակայն ավելի լուրջ ջանքեր են անհրաժեշտ խնդիրը կարգավորելու և ադրբեջանական զինծառայողներին Արցախի այդ բնակավայրերից դուրս մղելու համար, ասել է նա:

Նման հույսեր են հայտնվում նաեւ Հադրութում, նախկին բնագծերին վերադառնալու առումով։ Միեւնույն ժամանակ, որեւէ հստակություն չկա, թե արդյոք պահպանվելու են այդ բնագծերը, եւ արդյոք այդտեղ ռուսները ուղեկալներ կտեղադրեն։

Այսօր հրադադարի խախտմանը անդրադարձել է Կրեմլի խոսնակ Դմիտրի Պեսկովը։ «Տեղեկատվություն իսկապես քիչ կա, մենք հետեւում ենք․․․ նման իրադարձությունները տարածաշրջանում լրացուցիչ բեռ են խաղաղապահների համար»:

Ինչ են անելու ռուսներն այդ բեռից ազատվելու համար։ Կամ պետք է թուրքերին համոզեն հետ քաշվել, ինչը քիչ հավանական է, կամ պետք է իրենք հետ քաշվեն, իսկ «հայկական զինուժը չի կարող իրեն այնպես պահել, ինչպես ադրբեջանականը, նախեւառաջ ռուս խաղաղապահներին անհարմար դրության մեջ չդնելու համար», ինչպես ասել է վարչապետը։

Ավելին՝ այստեղ