Դիվանագիտության ասպարեզում 30 տարի կորցրել ենք. Արաքս Փաշայան
Ուշադրության կենտրոնում
Արաբագետ Արաքս Փաշայանն՝ անդրադառնալով Մինսկի խմբի համանախագահների այցին տարածաշրջան, Pressmedia.am-ի հետ զրույցում նշեց, որ առաջիկայում բավականին դժվար է լինելու վերադառնալ Մինսկի խմբի ձևաչափին, քանի որ համախագահող որոշ երկրներ օգտագործում են Արցախի հարցը Ռուսաստանի դեմ: Բացի այդ, այս պահին Արցախում ռուս խաղաղապահներն են և նրանք են անվտանգության երաշխավորը:
«Այդ ամենով հանդերձ, ես կարծում եմ, որ Հայաստանը պետք է շարունակի տարբեր կողմերի հետ աշխատել, որպեսզի արտաքին հարաբերություններում պահպանի հավասարակշռությունը: Ու թեև այս պահին Հայաստանը հայտնվել է շատ բարդ իրավիճակում, սակայն պետք է կարողանա հնարավորինս ճկուն գտնվել՝ հաշվի առնելով սեփական շահերն ու մարտահրավերները»,- ասաց Ա. Փաշայանը: Արաբագետի դիտարկմամբ Հայաստանը դիվանագիտական հարաբերությունների առումով վերադարձել է 1990-ական թվականներ: Այսինքն՝ բացի այն, որ 30 տարի կորցրել ենք, այլև՝ չունենք այնպիսի իշխանություն, որը կկարևորի այսօրվա առաջնահերթությունները և խնդիրները:
«Ես կարծում եմ, որ առաջիկայում արտաքին քաղաքականությունը պետք է կարևոր դեր հատկացնի ռազմավարությունների մշակմանը, վերանայի բոլոր այն կադրերը, որոնք պետք է ներգրավվեն այդ բարդ ու խրթին գործընթացների լուծման մեջ: Վերջին շրջանում շրջանառվող թեզերը, թե՝ ունենք դիվանագետներ, բայց չունենք դիվանագիտություն, ունենք գիտնականներ, բայց չունենք գիտական համակարգեր, պետք է հավելել, որ մենք ունենք նաև պետական մտածողության պակաս, քանի որ տասնամյակներ շարունակ մենք այդպես էլ չկարողացանք օգտագործել մեր գիտական ռեսուրսը և գիտական համայնքի առջև խնդիր դնել: Այս տարիների ընթացքում այդպես էլ չձևակեպվեց, թե ո՞րն է պետություն-գիտական համայնք համագործակցության հիմքը: Ուստի, կարծում եմ ժամանակն է հենց այդ կետից սկսել և համատեղ աշխատանքի շնորհիվ դուրս բերել երկիրը ստեղծված իրավիճակից»,- ասաց Ա. Փաշայանը:
Արմինե Վրացյան
1
2
3
4
5
2
3
4
5
1
2
3
4
5
