Այն բառապաշարը, որը հնչեցվում է հրապարակներից՝ վիրավորում է շատերին. փաստաբան
Ուշադրության կենտրոնում
Արցախի դեմ սանձազերծված ադրբեջանաթուրքական ահաբեկչական պատերազմի դադարից հետո, արդեն մոտ 1,5 ամիս է ընդդիմությունը ներկայացնող 17 կուսակցություն հանրահավաքներ ու բողոքի ակցիաներ է կազմակերպում՝ պահանջելով իշխանության անհապաղ հրաժարականը: Իշխանությունը, սակայն չի շտապում հրաժարվել իր դիրքերից, թեև չի ժխտում, որ երկրում ստեղծված իրավիճակի պատճառով հնարավոր է նոր ընտրություններ անցկացվեն:
Արտահերթ խորհրդարանական ընտրությունների անցկացման ժամկետների մասին դեռևս հստակություն չկա, բայց տպավորությունն այնպիսին է, որ ներքաղաքական օրակագը շարունակում է նախընտրական տրամաբանությամբ զարգանալ: Ու թեև հանրահավաքներն այնքան էլ մարդաշատ չեն, որի պատճառը նաև եղանակային պայմաններն են, սակայն, հասարակության շրջանում սկսվել է ակտիվ քննարկման առարկա դառնալ հանրահավաքների բանախոսների բառապաշարը, որը շատ դեպքերում դուրս է գալիս էթիկայի սահմաններից:
Փաստաբան Գևորգ Դավթյանը Pressmedia.am-ի հետ զրույցում խոսելով այս օրերին շրջանառվող «ժեխ» և այդօրինակ այլ որակումների մասին, նշեց, որ նմանատիպ բառապաշարը ցույց է տալիս հասարակության հանդեպ վերաբերմունքը, որին էլ հասարակությունը տալիս է իր համարժեք վերաբերմունքը:
«Հասարակության մեջ թեև իշխանափոխության պահանջ կա, սակայն հասարակության ստվար զանգվածը, չի ցանկանում մասնակցել նման բառապաշար ունեցող քաղաքական և հասարակական գործիչների կազմակերպած հանրահավաքներին, քանի որ այն բառապաշարը, որը հնչեցվում է հրապարակներից՝ վիրավորում է շատերին: Եվ պետք չէ մոռանալ, որ իրավական պետության մեջ ցանկացած արտահայտություն պետք է իրավական գերակայության սահմաններում լինի և չի խախտի այլոց իրավունքները: Նույնիսկ ամենածանր հանցագործության համար դատապարտված անձի հասցեին չի կարելի նման վիրավորական արտահայտություններ անել: Ի դեպ, այդ հարցը կարգավորվում է օրենքով և համարվում է դատապարտելի արարք անձի հանդեպ»,- ասաց Գ. Դավթյանը:
Նելլի Սիմոնյան
1
2
3
4
5
5
4
