Ալավերդու քաղաքապետի թեկնածուն հրաժարվում է մեկնաբանել խոշոր չարաշահումների մասին լուրերը

Ինչպես արդեն տեղեկացրել էինք` հունիսի 7-ին Ալավերդիում տեղի կունենան քաղաքապետի հերթական ընտրությունները:

Որքան էլ որ զարմանալի է, ՀՀԿ-ական ներկայիս քաղաքապետ Արտավազդ Վարոսյանն իր թեկնածությունը չի առաջադրել, նրա փոխարեն ՀՀԿ-ն նոր կադր ունի` Կարեն Փարեմուզյանը, ով անկուսակցական է և ինչպես պնդում են տեղի բնակիչները՝ չափից դուրս ջերմ եւ ընկերական հարաբերությունների մեջ է գտնվում Լոռու մարզպետ Արթուր Նալբանդյանի հետ: Ի դեպ, ասում են, թե նրանց ջրերը սկսել են հոսել մի առվով, երբ վերջիններս հիմք են դրել մեկ ընդհանուր` ջերմոցների բիզնեսներին, որտեղ աճեցվում են բացառապես լոլիկ եւ վարունգ:

Ըստ քաղաքական կուլիսներում պտտվող տեղեկությունների՝ Փարեմուզյանն իր թեկնածությունն առաջադրել է մարզպետի հրամանով: Ասում են, թե Արթուր Նալբանդյանը մեկ անգամ չէ, որ թեկնածուին փրկել է տարատեսակ սկանդալային եւ սենսացիոն պատմություններից, խոսքը գնում է մասնավորապես «Վալեքս գրուպ» ընկերությանը հասցրված ֆինանսական խոշոր վնասներ մասին: Ալավերդու մի շարք բնակիչներ պատմել են «Վալեքս գրուպում» նրա գործունեության որոշ մանրամասների մասին: Մասնավորապես խոսք է գնում ընկերությանը ֆինանսական խոշոր վնասներ հասցնելու մասին և նա այս գործից գլուխն ազատել է բացառապես իր մտերիմ մարզպետի ջանքերի շնորհիվ:

Հասկանալու համար, թե որքանով են համապատասխանում իրականությանը Փարեմուզյանի շուրջ պտտվող լուրերը, PressMedia.am-ը փորձեց կապ հաստատել նրա հետ, սակայն քաղաքապետի թեկնածուն կտրականապես հրաժարվեց պատասխանել որեւէ հարցի՝ պատճառաբանելով, թե. «Ես մինչեւ ընտրություն լրագրողներին ինտերվյու չեմ տալիս, դա մեր շտաբի որոշումն է, մեր կոնցեպցիան»:

Պահո՜, այստեղ են ասել` քաշված ենք, մեծն թեկնածուն դեռ քաղաքապետ չդարձած՝ իրեն լրիվ «արքայից արքա» է պատկերացնում, ինչ-որ կոնցեպցիաներ է բստրում, լրագրողների հետ չի շփվում, մի խոսքով իրեն լրիվ «էլիտար» եւ անհասանելի է պահում:

Էլ ոնց կլինի, պարո՛ն մարզպետի մտերիմ, հավանաբար գիշերներն այսուհետ քնել չի լինի, իսկ ԶԼՄ-ներն էլ թերեւս չաշխատեն մինչ ձեր քաղաքապետ ընտրվելը: Ինչ խոսք, դաժան եք, ահավոր դաժան: Թեկուզ մեղադրելու էլ չէ, քաղաքական դաշտում «չոչ անողները» մշտապես այդպես են ինքնահաստավում, սակայն վերջիններս հենց նույն լրագրողների շնորհիվ է, որ ուշքի են գալիս… Ամեն դեպքում՝ զգույշ եղեք «զվյոզդը տանելու» վատ հատկություն էլ ունի…

Սոսե Չանդոյան

Հ. Գ. Հետաքրքիր է, թե ինչով է պայմանավորված քաղաքապետի թեկնածուի վախեցած այս պահվածքը, չլինի՞ թե վարչապետի լոլիկաբուծության գործին խփելու համար Փարեմուզյանն անկյուն է կանգնեցվել եւ խիստ նկատողության արժանացել: