Անսպասելի ու ստորացուցիչ այցի էլեգիան

Վերջին մի քանի օրերին, չնայած պաշտոնական հերքմանը, պարզ դարձավ, որ ԱԱԾ տնօրեն Արմեն Աբազյանն, այնուամնայնիվ, կմեկնի Բաքու։ Հայաստանի կառավարությունը, ինչպես մամուլն է գրել, Արցախում ռուս խաղաղապահների հրամանատար գեներալ-լեյտենանտ Ռուստամ Մուրադովից ինքնաթիռ է խնդրել Աբազյանի՝ Բաքու այցը կազմակերպելու համար։

Փորձենք պարզաբանել, թե ինչո՞վ է հատկանշական սպասվելիք այցը․ եթե դա որևէ ձևով վերաբերելու է ՀՀ ազգային անվտանգությանը, միևնույն է՝ առաջին հերթին հարված է մեր ազգային արժանապատվությանը, որը նույնպես, ի դեպ, անվտանգային հասկացություն է։ Այնպես որ, ԱԱԾ ղեկավարությունը դեռ ժամանակ ունի որոշելու՝ անվտանգության ինչ-ինչ լուծելիք խնդիրնե՞րն են նախընտրելի, թե՞ ևս մեկ անգամ նվաստացվող մեր ազգային արժանապատվությունը։ Հայ հանրությունը տարօրինակ այդ այցի վերաբերյալ այլ ընկալում ուղղակի չունի։

Ըստ էության՝ Բաքու մեկնելու բուն իրողության մեջ արդեն իսկ ազգային անվտանգության տեսանկյունից անհանգստացնող բաներ կան։ Մոսկվայում 2020 թ․ դեկտեմբերի 29-ին հանդիպելուց հետո, որը, մամուլի վկայությամբ, անցել է ջերմ-բարեկամական մթնոլորտում և «պսակվել» նույնիսկ մեր կողմից ադրբեջանցիներին միակողմանի նվիրատվություններով, լրիվ անհասկանալի է, թե ի՛նչը կարող էր փոխել հանդիպումների այդ տրամաբանական ձևաչափը և չեզոք վայրի փոխարեն ԱԱԾ տնօրենին թռցնել թշնամական երկիր։ Այս ամենն ակամայից հիշեցնում է 5-րդ դարում հայ նախարարների Տիզբոն կանչվելուն։ Ի վերջո՝ ի՞նչ խնդիր է դրված Ա․ Աբազյանի առջև, որ պիտի լուծվի հե՛նց Բաքվում։

Ի դեպ, ադրբեջանական կողմը մեր հանդեպ եթե տարրական հարգանք ունենար, մտքով իսկ չպիտի անցկացներ իր երկրի մայրաքաղաքում հանդիպում կազմակերպելու առաջարկ անել։ Որովհետև, ուզենք թե չուզենք, այդ առաջարկն ընկալվում է որպես հաղթած կողմի հարկադրանք։ Եվ Հայաստանն էլ՝ որպես պարտված կողմ, իր հերթին չպիտի թույլ տար իրեն անպատվել՝ նմանօրինակ ստորացուցիչ այցի համաձայնելով։

Ցավալի է, բայց փաստ՝ ստորացուցիչ է նաև այցի նախապատրաստական ընթացքը․ ԱԱԾ տնօրենը Բաքու կմեկնի այն ժամանակ, երբ կորոշեն իրենք՝ ադրբեջանցիները, այսինքն՝ ԱԱԾ տնօրենը սպասողական կարգավիճակում կմնա, քանի դեռ կոնկրետ օրվա համար չեն հրավիրել։

Այնուհանդերձ ամենանվաստացուցիչը, թերևս, այն գիտակցումն է, որ ԱԱԾ տնօրենը չի մեկնում մեր շահերը պաշտպանելու, այլ ինչ-որ գաղտնի համաձայնություններ կնքելու։

Անի Ավագյան

Pressmedia.am