«44 օր պատերազմի մղձավանջ». Ղարաբաղի պատերազմի մասին ֆիլմ է ցուցադրվել լեհական հեռուստատեսությամբ

Iarex.ru-ն գրում է, որ Լեհական «TVP Info» լրատվական հեռուստաալիքը ցուցադրել է հայտնի ռազմական լրագրող և Մերձավոր Արևելքի փորձագետ Վիտոլդ Ռեպետովիչի «Տեսանելիության խորությունը - 44 օր պատերազմի մղձավանջ» 25 րոպեանոց ֆիլմը Արցախի (Լեռնային Ղարաբաղ) պատերազմի մասին: Ֆիլմ-ռեպորտաժը ներկայացված է պատերազմի վետերանների, նրանց հարազատների, ինչպես նաև իրենց տները լքած փախստականների հետ հարցազրույցների տեսքով: Նրանցից ոմանք երկրորդ անգամ են դարձել փախստական. առաջին անգամ 90-ականներին` Շահումյանի շրջանում իրենց տները թողնելով, և երկրորդ անգամ` հիմա, երբ հայրենի դարձած երկիրը պետք է թողնել Ադրբեջանին:

Վիտոլդ Ռեպետովիչի ֆիլմի հերոսը նաև Հայաստանի վաստակավոր արտիստ Սամվել Բաղինյանն էր, որը կամավոր է մասնակցել պատերազմին: Բաղինյանը 90-ականներին աշխատել է լեհական Օպոլե քաղաքի Յան Կոխանովսկու անվան Պետական դրամատիկական թատրոնում` որպես բեմադրիչ, իսկ նրա կինը ՝ Ջուլիետա Ստեփանյանը, դերասանուհի է: Կարոտելով իրենց հայրենիքին նրանք վերադարձել են Արցախ: Ֆիլմ-ռեպորտաժը մարդկային պատմությունների շուրջ հյուսված պատմությունների շարք է: «Ֆիլմը աշխարհը ցույց է տալիս այնպիսին, ինչպիսին կա, և ոչ թե այնպիսին, ինչպիսին մենք ուզում ենք տեսնել»,- ասվում է TVP- ի տեղեկատվական կայքում տեղադրված հաղորդման մեջ:

Վիտոլդ Ռեպետովիչը ֆեյսբուքյան իր էջում գրել է, որ ինքը ոչ միայն ռեպորտաժի հեղինակն է, այլ նաև ռեպորտաժում ներառված տեսանյութերի շուրջ 80% -ը նկարահանողը: Թղթակիցը պատերազմի առաջին իսկ օրերից եղել է Լեռնային Ղարաբաղում և անձամբ է տեսել ոչ միայն մարտերը, այլ նաև մայրաքաղաք Ստեփանակերտից բնակչության տարհանումը, այնուհետև պատերազմի ավարտի մասին համաձայնագրի ստորագրումից հետո նրանց վերադարձը: Իր վերջին հարցազրույցներից մեկում Վիտոլդ Ռեպետովիչն ասել է, որ վերջնական խաղաղության մասին խոսելը դեռ վաղ է: Նրա դիտարկումների համաձայն, հակամարտությունը մտել է ցածր սրացման փուլ:

Սյունե Արսենյան

Pressmedia.am