Դարի դավադրության տեսությունը կամ ինչու՞ կտրել քեզ կերակրող ձեռքը

ԹԻՄ ՍՊԸ համահիմնադիր, Տելեկոմ Արմենիա ՓԲԸ տնօրենների խորհրդի նախագահ Ալեքսանդր Եսայանը հանդես է եկել հայտարարությամբ, որով հերքել է վերջին շրջանում իր և իր եղբոր՝ Հայկ Եսայանի դեմ կազմակերպված ապատեղեկատվական արշավը: Պետք է նկատել, որ վերջին օրերին ակնհայտ ուղղորդված տարաբնույթ հրապարակումներ են տարածվում նրանց և նրանց ղեկավարած ընկերության հասցեին:

Ընդհանրապես, Հայաստանում գործելաոճ է դարձել տարաբնույթ ապատեղեկատվությունների միջոցով բիզնեսի նկատմամբ արշավներ կազմակերպելը, սակայն, հաշվի չեն առնվում, որ դրանով առաջին հերթին մեր տնտեսական համակարգն է խոշոր կորուստներ կրում:

Ալեքսանդր Եսայանը իր հայտարարության մեջ մասնավորպես նշել է.

«Մասնավորապես պետք է նշեմ վերջին օրերի հրապարակումները, որոնք, թիրախավորելով իմ և եղբորս կողմից ստեղծված ԹԻՄ ընկերությունը, իրենց անհեթեթությունների և հորինված կոնսպիրատիվ տեսություններով արդեն որերորդ ամիսն է, փորձում են մեզ ներկայացնել մեկ մի ճամբարից, մեկ մյուս: Պատմությունը սկսվեց այն բանից, երբ առևտրային բանկերին դիմելու ժամանակ մի շարք լրատվամիջոցներ որոշեցին կապել մեր կազմակերպության անունը տարբեր բանկերի հետևում կանգնած ուժերի հետ, ապա սկսվեց մի երկար ապատեղեկատվական արշավ, թե իբր կառավարությունից զբաղվում են Վեոն Արմենիան ձեռքբերման աջակցությամբ, և ամեն անգամ հրապարակելով իմ նկարը` հորինվածքներ սկսվեցին շարադրվել տարբեր թերթերում: Մինչ այժմ արտահայտած որևէ պնդում անհատի կամ լրատվամիջոցի կողմից չի հաստատվել, և դրանք մնացել են հեքիաթի ժանրում օդում կախված, իսկ մենք որևէ հերքում կամ ներողության խոսք չենք ստացել որևէ անհատի կամ կազմակերպության կողմից: Հայտարարում եմ, որ Թիմ ՍՊԸ միակ վերջնական սեփականատերերը ես և եղբայրս ենք` Ալեքսանդր և Հայկ Եսայաններս, և Վեոն Արմենիա ՓԲԸ ձեռքբերման գործընթացում որևէ պետական երաշխիքներ չեն ստացվել:
Տելեկոմ Արմենիա ընկերությունը այժմ գտնվում է վերակազմավորման, ինտեգրացիայի և ներդրումային խոշոր միջազգային ծրագրերի կարևորագույն փուլում: Նման հրապարակումները կործանարար ազդեցություն են ունենում կազմակերպության միջազգային հեղինակության վրա, ձախողում ներդրումային գումարների ներգրավումը դեպի Հայաստան: 
Կրկնում եմ, հարգելիներս, զերծ մնացեք ստից և կեղծիքից, չստուգված, ապացույց չունեցող հրապարակային գրառումներից. դրանով վնասում եք հենց ձեզ և բոլորիս, վնասում եք մեր հայրենիքին»:

Պետք է նկատել, որ այնպիսի ստրատեգիական ոլորտ, ինչպիսին հեռահաղորդակցության ոլորտն է Հայատանում, զարգացման ամբողջ պատմությունը էապես կապված է եղբայրների գործունեության հետ: Նրանք այս ընթացքում ցուցաբերել են հակաճգնաժամային կառավարման և զրոյից տնտեսություններ հիմնելու և զարգացնելու հատկություններ: Նմանատիպ կազմակերպված արշավները փաստորեն ստիպում են, որ բիզնեսը, ինչը նշանակում է երկիրը և նրա տնտեսությունը զարգացնելու փոխարեն գործարար ոլորտի ներկայացուցիչները պետք է ժամանակ հատկացնեն և հերքեն ապատեղեկատվությունները, որոնք ուղղակիորեն բիզնեսին վնասելու միտում են պարունակում: Ինչ վերաբերվում է այս կամ այն իշխանության հետ նրանց կապելու փորձերին, ապա անչափահաս երեխային էլ պարզ է, որ հնարավոր չէ լինել խոշոր ներդնող և խոշոր հարկատու, և ուղղակիորեն աշխատանքային հարաբերություններ չպահել ոլորտների ղեկավարների կամ ներկայացուցիչների հետ: Այնպես որ, դրա շուրջ դավադրության տեսություններ հորինելը դրա հեղինակների վառ երևակայության խնդիրն է:

Խանգարել բիզնեսին՝ նույնն  է, որ կտրես քեզ կերակրող ձեռքը: