«Սոց­փա­թե­թում նե­րառ­ված ծա­ռա­յու­թյուն­նե­րի շրջա­նա­կը կընդ­լայն­վի. լո­ղա­վա­զան, սպոր­տա­յին հա­մա­լիր և այ­լուր այ­ցե­լե­լու հնա­րա­վո­րու­թյուն կտրվի». «Փաստ»

«Փաստ» օրաթերթը գրում է

ՀՀ աշխատանքի և սոցիալական հարցերի նախարարությունը հանրային քննարկման է ներկայացրել նախագիծ, որը մշակվել է սոցփաթեթում ներառված ծառայությունների շրջանակը ընդլայնելու նպատակով։ Առաջարկվում է փոփոխություն կատարել «Պետական պաշտոններ և պետական ծառայության պաշտոններ զբաղեցնող անձանց վարձատրության մասին» օրենքում։ Նախարարության ներկայացրած նախագծի հիմնավորման մեջ նշվում է՝ օրենքի 26-րդ հոդվածի 1-ին մասի համաձայն՝ պետական պաշտոն և պետական ծառայության պաշտոն զբաղեցնող անձանց և (կամ) նրանց ընտանիքի անմիջական անդամներին սոցիալական փաթեթ կառավարության սահմանած կարգով և դեպքերում տրամադրվում է առողջապահության ծառայությունների, հիփոթեքային վարկի ամսական վճարի մարման, ուսման վճարի, Հայաստանի Հանրապետությունում և Լեռնային Ղարաբաղի Հանրապետությունում հանգստի ապահովման նպատակով։

Սոցփաթեթի հատկացման կարգը և փաթեթի մեջ մտնող ծառայությունների բովանդակությունը սահմանված է կառավարության համապատասխան որոշմամբ, որի 2-րդ հավելվածի 1-ին կետի համաձայն՝ սոցիալական փաթեթը ներառում է հետևյալ ծառայությունները` հանգստի ապահովում Հայաստանի և Լեռնային Ղարաբաղի Հանրապետություններում, հիփոթեքային վարկի ամսական վճարի մարում, ուսման վճար և սոցփաթեթի շահառուի առողջության ապահովագրության լրացուցիչ ծառայությունների նվազագույն փաթեթի և (կամ) սոցփաթեթի շահառուի ընտանիքի անդամի առողջության ապահովագրության նվազագույն բազային փաթեթի ձեռքբերում: Յուրաքանչյուր ծառայության համար սահմանված են կոնկրետ չափորոշիչներ և ծառայությունից օգտվելու ընթացակարգ։

Ի՞նչ է առաջարկում նախարարությունը: Ավելացնել սոցփաթեթում ներառված ծառայությունների շրջանակը։ Մասնավորապես՝ նշվում է, որ սոցփաթեթի շահառու աշխատողների սոցիալական կարիքների բավարարման, մոտիվացման և աշխատանքի արդյունավետության, պետական մարմիններում և կազմակերպություններում աշխատանքի գրավչության բարձրացման, պետական հատվածից դեպի մասնավոր հատված կադրերի հոսքի կրճատման նպատակով նախատեսվում է սոցփաթեթի ծառայություններում ներառել նաև այնպիսի ուղղություն, որով հնարավոր կլինի սոցփաթեթի համար հատկացվող միջոցներն ուղղել նաև մարզա-առողջարարական և սպորտային համալիրների, լողավազանների և այլ սպորտային կազմակերպությունների ծառայություններից օգտվելու համար սահմանված վճարի մարմանը՝ նպաստելով շահառուների առողջ ապրելակերպի ձևավորմանը և ֆիզիկական կոփմանը։

Մանրամասները՝ «Փաստ» օրաթերթի այսօրվա համարում