Հայ-ամերիկյան շփումների հնարավոր հեռանկարը
Վերլուծություն
Օրերս ԱՄՆ պետքարտուղար Էնթոնի Բլինկենը հայտարարել է, որ ԱՄՆ-ն միջոցներ կձեռնարկի ՌԴ-ում ընդդիմադիր Նավալնիի շուրջ ստեղծված վիճակի առնչությամբ: Գերմանիայի կանցլեր Անգելա Մերկելն էլ հայտարարել է, որ հավանական են պատժամիջոցներ ռուսաստանյան պաշտոնյաների հանդեպ Նավալնիի գործով: Ակնառու է, որ Նավալնիի գործի առնչությամբ Արևմուտքը մեծացնելու է ճնշումը Ռուսաստանի վրա: Սա, բնականաբար, խնդիր է նաև ՀՀ համար, որովհետև այդ ճնշումը կարող է ներառել նաև կովկասյան ռեգիոնը: Ըստ այդմ, Հայաստանի ու Արցախի համար կա քաղաքական առանցքային խնդիր՝ անել այնպես, որպեսզի Ռուսաստանի հանդեպ Արևմուտքի ճնշման նոր ալիքը շրջանցի Հայաստանի ու Արցախի համար կենսական նշանակության գոտիներն ու հանգամանքները: Այլապես, Հայաստանն ու Արցախը իրենց վրա զգալու են նոր մարտահրավերներ, անվտանգային նոր սպառնալիքներ, հատկապես, որ Թուրքիան իր համար «դրախտային» է դիտարկում Արևմուտք-ՌԴ հարաբերության սրացումը ընդհանրապես:
ՀՀ ԱԳ նախարար Արա Այվազյանը նախօրեին հեռախոսազրույց էր ունեցել ԱՄՆ պետքարտուղարի տեղակալի պաշտոնակատար Ֆիլիպ Ռիքերի հետ: Երևան-Վաշինգտոն շփումների ինտենսիվացումը Հայաստանի համար ներկայումս ունի առավել քան էական նշանակություն՝ անվտանգային տեսանկյունից: Իրադրությունն այդ առումով, անշուշտ, բարդ է, որովհետև մի կողմից կա Ռուսաստանի հետ սերտ աշխատանքի անհրաժեշտություն, մյուս կողմից կա ԱՄՆ և նրա հյուսիսատլանտյան գործընկերներին հավաստիացնելու կարիք, որ, ի դեմս Հայաստանի և Արցախի, նրանք գործ ունեն հայկական տարածքի և սուբյեկտության, խոցված, վիրավոր, սակայն հայկական պետականության ու սուբյեկտության, այլ ոչ ռուսական քաղաքականության կցորդի հետ:
Իհարկե, որևէ մեկը Արևմուտքում պատրանք չունի Ռուսաստանի ազդեցությունից Հայաստանի ազատ և անկաշկանդ լինելու հարցում, սակայն նրանց մոտ համոզվածությունը, որ թեկուզ թույլ, սահմանափակ, թեկուզ կարկամ, սակայն Արևմուտքի հետ էլ աշխատելու գործում Հայաստանը անկեղծ է՝ շատ կարևոր է: Իհարկե, միևնույն ժամանակ կարևոր է Ռուսաստանին կասկածի տեղիք չտալն ու այդ առումով էլ համոզիչ լինելը, այն իմաստով, որ Հայաստանը ներկայումս զբաղված չէ մի ճամբարից մյուսն անցնելով, այլ զբաղված է ընդամենը երկու ճամբարներից որևէ մեկում չհայտնվելու և, միաժամանակ, նրանց արանքում չմնալու հնարավորություններ մշակելով:
Աննա Սիմոնյան
1
2
3
4
5
1
2
3
4
5
1
2
3
4
5
