Ամուլսարը չպետք է շահագործվի և վերջ
Ուշադրության կենտրոնում
Ամուլսարի խնդրի հետ կապված կառավարության վերջին նիստերից մեկի ժամանակ վարչապետը խոսեց, որ հնարավոր է ցավոտ լուծումներ լինեն: Այդ թեմայով pressmedia.am կայքը զրուցել է բնապահպան Ինգա Զառաֆյանի հետ։
— Տիկին Զառաֆյան, այս տարի Սևանա լճի մակարդակը բարձրացել է 12 սմ-ով: Սա ի՞նչ խնդիրներ կարող է առաջացրել:
— Սևանի մակարդակը պետք է բարձրանա շատ ավելի շատ։ Հիմա, որ բարձրացել է, դա պետք է այդ գործընթացի սկիզբը լինի և ոչ մի դեպքում Սևանի մակարդակը չպետք է նվազի։ Սևանա լճի էկոհամակարգի առաջին պայմանը այն է, որ մակարդակը բարձրանա, գոնե մինիմալ նիշին հավասարվի, և երկրորդ պայմանը այն է, որ անընդհատ բարձրացում-իջեցում-տատանում չլինի, որովհետև այդ տատանումը հարմար չէ համակարգի համար։
— Ամուլսարի խնդրի հետ կապված կառավարության վերջին նիստերից մեկի ժամանակ վարչապետը խոսեց, որ հնարավոր է՝ ցավոտ լուծումներ լինեն: Ի՞նչ ցավոտ լուժումների մասին է խոսքը և ի՞նչ քայլեր պետք է ձեռնարկվի՝ հաշվի առնելով հասարակական տրամադրությունները:
— Այդ հարցը դուք վարչապետին տվեք, թե ի՞նչ ցավոտ լուծումների մասին է խոսել, միայն ինքը պետք է իմանա, թե որն է իր համար ցավոտ լուծումը։ Մեզ համար այդ խնդիրը միայն մեկ լուծում ունի՝ Ամուլսարը չպետք է շահագործվի և վերջ։ Բազմաթիվ հիմնավորումներ ներկայացված են եղել և միջազգային հանրության կողմից (իմիջիայլոց, լուրջ միջազգային հանրության կողմից) և տեղի հասարակության կողմից։ Ամենաճիշտը ասեմ՝ տեղի բնակչության կողմից, խոսքը գնում է Ջերմուկի համայնքի մասին։ Կան բազմաթիվ փորձագիտական եզրակացություններ, որոնք ներկայացված են եղել կառավարությանը։ Եվ Ամուլսարի հետ կապված, բացի շահագործման այդ դրական եզրակացությունը չեղյալ համարելուց, ուրիշ ոչ մի լուծում լինել չի կարող։ Ու, եթե չեղյալ չհամարվի, ապա հակառակ կլինի և Ջերմուկ համայնքի շահերին, և հասարակության շահերին, և միջազգային (իմիջիայլոց, մեր կողմից ընդունված և ստորագրված) փաստաթղթերի դրույթներին։ Այսինքն, բոլոր դեպքերում այս հանքը պետք է չշահագործվի, դա է մեր դիրքորոշումը և մենք մեր դիրքորոշումը չենք փոխի։
Աննա Սիմոնյան
1
2
3
4
5
5
4
