Հայաստանում գոյություն ունի երկրորդ ռուսական ռազմաբազա

Հայաստանի պաշտպանության նախարար Վաղարշակ Հարությունյանը հարցազրույցում ասել է, որ Հայաստանը շահագրգռված է Գյումրու ռուսական 102-րդ ռազմակայանի ընդլայնման և ներուժի ավելացման հարցում։ Նախարարն ասել է, որ Հայաստանը միշտ ունեցել է այդ հետաքրքրությունը, թեկուզ այն պատճառով, որ բազան ամբողջապես ներառված է հայ-ռուսական միացյալ զորախմբի կազմում։  Այս թեմայով pressmedia.am կայքը զրուցել է ռազմական փորձագետ Կարեն Վրթանեսյանի հետ` պարզելու համար, թե այս հայտարարությունը ինչ նպատակ է հետապնդում։

— Պարոն Վրթանեսյան, ինչպե՞ս եք գնահատում այս հայտարարությունը։

— Այդ հայտարարությունն ուղղակի իրականությունն է արձանագում և իրանակում իրենից ոչ մի նոր բան չի ներկայացնում, որովհետև այն փաստը, որ այսօր, օրինակ, Սյունիքում ռուս սահմանապահներ են և արդեն այդ փաստը վկայում է այն մասին, որ, ըստ էության, Հայաստանում գոյություն ունի երկրորդ ռուսական ռազմաբազա, քանի որ այդ մարդիկ, բնականաբար, ինչ-որ տեղ տեղակայված են, որտեղ քնում են, հաց են ուտում։ Ֆորմալ առումով միգուցե ամրագրված չէ, բայց, ըստ էության, երկրորդ ռազմաբազան արդեն կա։

— Ի՞նչ նպատակ է հետապնդում այսպիսի հայտարարությունը։

— Չգիտեմ, թե ինչ նպատակ է հետապնդում, պատրաստակամություն հայտնել մի բանի, որը արդեն գոյություն ունի։ Ես ընդհանրապես Վաղարշակ Հարությունյանի հայտարարություններին լուրջ չէի վերաբերվի, որովհետև նա այնպիսի պաշտոնյա է, որ ընդհանրապես ինքը որևէ որոշում չի կայացնում և ունակ էլ չէ կայացնելու։ Պարզապես մեկին դրել են այդ աթոռին, որ ցույց տան այդ աթոռի զբաղված լինելը և ինքը անում է այն, ինչ իրեն ասում են։ 

Լուսինե Անանյան

Pressmedia.am