Բացի Գագիկ Ծառուկյանից

Երբ կարդում եմ հայաստանյան մի շարք լրատվամիջոցների հրապարակած հոդվածները, տպավորություն է ստեղծվում, որ այս երկրում ոչ մի լուրջ խնդիր չկա, որ այս երկիրը չունի արտաքին և ներքին մարտահրավերներ, չունի արտաքին պարտք, երկրում չկա աղքատություն, չկա արտագաղթ, չկան սոցիալական խնդիրներ և կոռուպցիա, որ մարդկանց չի հետաքրքրում գիտությունը, մշակույթը կամ սպորտը, այլ հետաքրքրում է միայն մի բան՝ կվերադառնա՞ Գագիկ Ծառուկյանը քաղաքականություն, թե՞ ոչ:

Հիշո՞ւմ եք՝ հին խորհրդային հայտնի «Կարնավալային գիշեր» ֆիլմի հարբած հերոսներից մեկը բեմում ելույթ ունենալիս ինչ էր ասում՝ «Есть ли жизнь на Марсе, нет ли жизнь на Марсе – науке это неизвестно»: Այ հիմա նույնը մի շարք լրատվամիջոցների մոտ է՝ կվերադառնա՞ Ծառուկյանը, չի՞ վերադառնա...

Ես ինքս, անկեղծ, չգիտեմ՝ կվերադառնա, թե՝ ոչ: Սակայն դրա փոխարեն գիտեմ, ավելի շուտ՝ հայտնաբերել եմ, որ այսօր Ծառուկյանի մասին երևի ավելի շատ են գրում, քան նրա՝ քաղաքականության մեջ եղած ժամանակ: Փաստորեն, որպեսզի քաղաքական գործիչն ավելի շատ հայտնվի լրատվամիջոցների ուշադրության կենտրոնում, պետք է դուրս գա քաղաքականությունից, և լրատվամիջոցների կողմից «PR»-ը պատրաստ է, ընդ որում՝ անվճար: 

Այն, որ Գագիկ Ծառուկյանը զբաղվել է և զբաղվում է բարեգործությամբ՝ անկախ քաղաքականության մեջ լինելու հանգամանքից, բոլորն են տեղյակ, և դա որևէ ապացույցի կարիք չունի, իսկ նրա՝ բարեգործությամբ զբաղվելը քաղաքականություն վերադառնալու ցանկությամբ պայմանավորելը պարզապես անմտություն է:

Այո´, լրատվամիջոցները, գուցեև չգիտակցելով կամ էլ բացասական էֆեկտի ակնկալիքով, իրականում հակառակ ազդեցությունն են թողնում: Արդյունքում Գագիկ Ծառուկյանի վերադառնալ-չվերադառնալու հարցը սկսում է հուզել բոլորին, թերևս բացի հենց իրենից՝ Գագիկ Ծառուկյանից:

Կարեն Վարդանյան

Աղբյուրը` Lurer.com