Պատերազմի հավանականությունը բացառել պետք չէ

Զինված ուժերի գլխավոր շտաբը, ըստ էության, չունի պետ, հետևաբար բանակաշինության գործընթացներ, մեծ հաշվով, չեն իրականացվում, ինչը պատերազմից հետո անհրաժեշտ էր համարվում ԶՈՒ-ի համար: Այս թեմայով pressmedia.am կայքը զրուցել է ռազմական փորձագետ Դավիթ Հարությունովի հետ։ 

— Պարոն Հարությունով, ինչպե՞ս եք գնահատում իրավիճակը: 

— Այդ իրավիճակը բավականին խնդրահարույց է։ Ներկա քաղաքական ճգնաժամը, պարզ է, ազդում է զինված ուժերի վրա, ինչը չափազանց բացասական միտում է։ Միշտ էլ այդպես է, երբ զինված ուժերն իր վրա զգում է քաղաքականության պայքարի երկու կողմերի բախումը, ապա դրա էֆեկտիվությունը նվազում է։ Վարչապետի և նախագահի միջև առերևույթ համաձայնության չկա ԳՇ պետի հարցում։ 

— Ձեր կարծիքով, ընդհանուր առմամբ, ո՞ւմ մեղքով է ստեղծված իրավիճակը: 

— Դժվար է մեղավորներ գտնել, ստեղծվել է ինչ-որ օբյեկտիվ իրավիճակ, որը հետևանքն է պատերազմի։ Այսինքն, մի կողմից իշխանությունը թույլ է, բայց հանրային որոշակի աջակցություն ունի, մյուս կողմից ընդդիմությունն է, որը նույնպես աջակցություն ունի։ Արդյունքում պատային իրադրություն է ստեղծվել։ Եվ այդ պատճառով ԳՇ հայտարարությունը և միջամտությունը չփոխեց իրավիճակը։ 

— ՊՆ հայտարարել է մեծամասշտաբ զորավարժությունների անցկացման մասին։ Այս շրջանում համատեղ զորավարժություններ են կազմակերպելու նաև Թուրքիան ու Ադրբեջանը։ Այսօր մարդիկ մտավախություն ունեն, որ հնարավոր է նոր պատերազմ սկսվի։ Ինչպե՞ս եք գնահատում դրա հավանականությունը։ 

— Ընդհանրապես պատերազմի հավանականությունը բացառել պետք չէ, բայց այս պահին դա քիչ է, որովհետև նոր մարտական գործողությունները կնշանակեն Ռուսաստանի հետ ընդհարում։ Այն տարածաշրջանում, որտեղ պետք է այդ գործողություններն ընթանան, ռուս խաղաղապահներն են և այդ գործոնը հաշվի առնելով, այս պահին հավանականությունը ցածր է։ Բայց ընդհանրապես այդ հավանականությունըմիշտ էլ կա։ 

— Վերջին շրջանում ակտիվ քննարկումներ են այն մասին, որ Սյունիքի և Տավուշի մարզում Ադրբեջանական կողմը չափագրումներ է կատարում։ Բնակիչները խոսում են այդ մասին, իսկ պաշտոնական կառույցները հերքում են։ Ձեզ ի՞նչ է հայտնի այդ մասին։ 

— Իմ ունեցած տեղեկատվությունը չի տարբերվում ժողովրդին հայտնի տեղեկատվությունից։ Ես էլ գիտեմ այն, ինչ բոլորը։ Սյունիքի հետ կապված կարող եմ ասել, որ խնդիրներ կան։ Այդ խնդիրը առաջին գծի կահավորման և ապահովման հետ են կապված։ Ու հաշվի առնելով նաև բարդ տեղանքը, ապա լուրջ խնդիր է առաջանում այդ գիծը, տեղանքը վերահսկելու համար։ Դա օբեկտիվ պրոցես է, որը պահանջում է որոշակի ժամանակ և ջանքեր։ Ինչ վերաբերում է ձեր հարցին ապա ես գիտեմ միայն այն, որ քաղաքացիները տեղեկատվությունը հրապարակում է, հաստատելով, որ կա նման իրավիճակ, իսկ պետական մարմինները հերքում են դրանք։ Ես տեղյակ չեմ, թե ով է ստում և ով է ճիշտ ասում և դրա համար ձեռնպահ եմ մնում որևէ գնահատական տալուց։ 

 — Հայաստանում ներքաղաքական լարված իրավիճակ է և հասարակությունը, պառակտվել է։ Մի մասը մերժում է ներկաներին, մյուս մասը մերժում է նախկիններին, իսկ երրորդ կողմը՝ մերժելով երկու կողմերին էլ, փնտրում է այլընտրանք։ Վերջերս «Թովմասյան հիմնադրամի» ղեկավար Արտակ Թովմասյանը հայտարարեց «Երրորդ ուժ» քաղաքացիական նախաձեռնություն ստեղծելու մասին, ասելով, որ այս նախաձեռնության մասնակիցները քաղաքականությամբ չզբաղված անհատներ են։ Ի՞նչ կարծիք ունեք քաղաքական այս նոր նախաձեռնության մասին։

—Ինձ համար գլխավորը այն է, թե քաղաքական ուժը ինչ է առաջարկում։ Մենք այսօր լավ ճանաչում ենք և իշխանություններին և ընդդիմություններին, բայց նոր ուժերի մասին շատ բան հայտնի չէ։ Ինչ վերաբերում է կոնկրետ իրավիճակին՝ կարող եմ ասել, որ մեր հասարակությունը չի պառակտվել և զգալի մասը չեն աջակցում երկու բևեռներին էլ և սոցհարցումները ցույց են տալիս, որ մարդկանց 40-ից ավելի տոկոսը ոչ մեկին չի աջակցում։

Աննա Սիմոնյան

Pressmedia.am