Հայաստանի ընդդիմությունը պատրաստվում է ընտրություններին

Tsargrad.tv-ն գրում է, որ Հայաստանի քաղաքական ուժերն արդեն պատրաստվում են արտահերթ խորհրդարանական ընտրություններին, որոնք դեռ պաշտոնապես չեն նշանակվել: Ընդդիմության ճամբարում ավելի ու ավելի հստակ են որոշվում մի քանի տարբեր դիրքորոշումներ` պայմանավորված այն հանգամանքով, որ ընդդիմադիրներից շատերն անընդունելի են համարում Նիկոլ Փաշինյանի վարչապետության օրոք ընտրությունների անցկացումը:

Վարչապետ Նիկոլ Փաշինյանի հետ Գագիկ Ծառուկյանի հանդիպումից և արտահերթ ընտրություններ անցկացնելու մասին պայմանավորվածություն ձեռք բերելուց հետո «Բարգավաճ Հայաստանը» պաշտոնապես դուրս չի եկել «Հայրենիքի փրկության շարժման» շարքերից, սակայն արդեն ակնհայտ է որ, ինչպես ավելի վաղ հայտարարել էր ինքը՝ Ծառուկյանը, այս քաղաքական ուժը ինքնուրույն է մասնակցելու ընտրություններին:

Շարժման մեջ ընդգրկված մնացած ուժերից Ազգային անվտանգության ծառայության նախկին տնօրեն Արթուր Վանեցյանի «Հայրենիք» կուսակցությունը արդեն հայտարարել է, որ մասնակցելու է ընտրություններին, բայց թե ինչ ձևաչափով դեռ հստակեցվելու է լրացուցիչ: Երկրի նախկին նախագահ, նախկին իշխող Հայաստանի Հանրապետական Կուսակցության ղեկավար Սերժ Սարգսյանը, պատասխանելով լրագրողների հարցին` պարզաբանել է իր վերաբերմունքը արտահերթ ընտրություններին, և խոստացել մանրամասն խոսել դրանց մասին ընտրությունների օր նշանակվելուց հետո:

Այնուամենայնիվ, այս կուսակցության ներկայացուցիչները արդեն իսկ չեն բացառում մասնակցությունը ընտրարշավին, եթե անգամ վարչապետ լինի Նիկոլ Փաշինյանը: ՀՅԴ-ն հայտնել է, որ իրենք իրենց տարածաշրջանային կառույցների ղեկավարների հետ սկսել են քննարկել երկրում ստեղծված նոր իրավիճակը: Եվ չնայած «Հայրենիքի փրկության շարժման» վարչապետի թեկնածու Վազգեն Մանուկյանը կտրականապես բացառել է իր մասնակցությունը ընտրություններին, փորձագետների մոտ տպավորություն է ստեղծվել, որ արմատական ընդդիմությունը փնտրում է քարոզարշավում ներգրավվածության ձևաչափեր:

Այդ ֆոնին հանգստյան օրերին հայտարարվել է նոր ընդդիմադիր ուժի ծնունդ ի դեմս Վերածնվող Հայաստան կուսակցության: Նրա արդեն կազմավորված վարչության ողնաշարը բաղկացած է Սյունիքի մարզի գրեթե բոլոր քաղաքների քաղաքապետերից, որոնք միացել են Նիկոլ Փաշինյանի հրաժարականի պահանջին և անցանկալի որակել Փաշինյանի այցը իրենց քաղաքներ: Խոսքը Գորիսի, Քաջարանի, Սիսիանի և Մեղրիի քաղաքապետերի մասին է:


Աննա Սիմոնյան

Pressmedia.am