«Լուսավոր Հայաստան» կուսակցությունը պետք է հանրամատչելի կերպով մեկնաբանի, թե ինչու չի ցանկանում ընտրական օրենսգրքի փոփոխություն

«Լուսավոր Հայաստան» խմբակցության ղեկավար Էդմոն Մարուքյանը հայտարարել էր, որ, եթե ընտրություններից առաջ «Իմ քայլը» խորհրդարանում ընդունի նոր Ընտրական օրենսգիրք, ապա ԼՀԿ-ի հետ ունեցած բոլոր գործող պայմանավորվածությունները ջուրը կլցվեն։ Այսօր էլ ՀՀ Նախագահ Արմեն Սարգսյանի հետ հանդիպման ժամանակ  ԼՀԿ խմբակցության ղեկավարը հայտնել էր, որ ԼՀԿ-ն կարևորում է, որ արտահերթ ընտրությունները ընթանան ներկայումս գործող ընտրական օրենսգրքով։

Այս թեմայով pressmedia.am  կայքը զրուցել է քաղաքագետ Ռուբեն Մեհրաբյանի հետ։ Հարցին, թե ինչ նպատակով ԼՀԿ-ն չի ցանկանում փոփոխել օրենսգրիքը և  ինչ պայմանավորվածությունների մասին կարող է լինել խոսքը, քաղաքագետը ասաց, որ  այդ ամենին հստակ պատասխան կարող են տալ միայն խմբակցության անդամները։

Անդրադառնալով այն հարցին, որ, եթե, այնուամենայնիվ, ընտրական օրենսգիրքը չփոփոխվի, ապա  ԱԺ-ում ընտրություններից հետո ինչ փոփոխություններ կարող են լինել, Ռուբեն Մեհրաբյանը պատասխանեց․ «Ռեյտինգային ընտրակարգը, կարող եմ այսպես ասել, որ դա ժամացույցով  դրված ական է Հայաստանի ժողովրդավարության համար` իր բոլոր հետևանքներով։ Եվ, եթե Լուսավոր Հայաստանը կարողանա հանրամատչելի ձևով հակառակը հիմնավորել, ապա ես պատրաստ եմ լսելու, բայց  ես դրա հնարավորությունները, գոնե այս պահին չեմ տեսնում»։

Անի Սիմոնյան

Pressmedia.am