Ի՞նչ շանսեր ունի «Լուսավոր Հայաստան» կուսակցությունը

 Արդեն ակնհայտ է, որ «Լուսավոր Հայաստան» կուսակցության ԱԺ պատգամավորական խմբակցությունը դարձել է իշխանությունների համար օրենսդրական նախագծերի և կարևոր գաղափարների յուրատեսակ ինկուբատոր։ Խնդիրն այն է, որ«Լուսավոր Հայաստան» խմբակցությունը պարբերաբար հանդես է գալիս շատ կարևոր օրենսդրական նախաձեռնություններով, որոնք հերոսաբար մերժվում են «Իմ քայլի» կողմից, բայց մի որոշ ժամանակ անց կրկնակի հերոսությամբ « Լուսավորի» նախագիծը նույնությամբ իրենք են ներկայացնում ու հպարտ-հպարտ հայտարարում, թե «տեսեք՝ ինչ գործեր ենք անում»։

Ինչևէ, իշխանությունները գոնե մի բան կարողանում են լավ անել՝ ուրիշի աշխատանքի հաշվին քաղաքական դիվիդենտներ հավաքել։ Այդուհանդերձ, պետք է արձանագրենք, որ պառլամենտարիզմն իր ողջ էությամբ ու գաղափարաբանությամբ, հաջողությամբ ու արդյունավետությամբ իրացվում է ԼՀԿ-ի կողմից, ինչը առաջիկա ընտրություններում այդ ուժին կարող է լրջագույն ցուցանիշներ արձանագրելու հնարավորություն ապահովել։

Ներկա-նախկին անբովանդակ ու արդեն ականջ սղոցող դիսկուրսով զբաղված՝ իշխանություններն ու ընդդիմադիր դաշտի մեծ մասը, կարծես թե մոռացել են, որ Հայաստանը երկիր է, որտեղ մարդիկ են ապրում, կուտակված խնդիրներ կան, արտաքին մարտահրավերներ կան, և որ դրանցով զբաղվել ու լուծել է պետք։ Սա ընդգծում եմ այն պարզ պատճառով, որ այս ֆոնին Էդմոն Մարուքյանի գլխավորած ուժն` իր փոքրաթիվ խմբակցությամբ, շոշափելի աշխատանքներ է իրականացնում։ Ի դեպ, նկատած կլինեք, որ հանրության մի ստվար հատվածի մոտ կարծիք ու համոզմունք է աստիճանաբար ձևավորվում, որ առաջիկա ընտրություններում պետք է սատարել և քվեարկել «Լուսավոր Հայաստան» օգտին 2 շատ պարզ պատճառով։ Նախ, այդ ուժը ըստ էության է հասկանում իր առաքելությունը՝ պառլամենտական այս 3 տարիներին ցույց տալով տպավորիչ աշխատանք։ Եվ երկրորդ՝ ինչ-ինչ, բայց թե Մարուքյանը, թե նրա թիմի անդամները չեն ասոցացվում ոչ նախկինների, ոչ էլ ներկաների հետ, թաղված չեն և չեն եղել տարատեսակ կոռուպցիոն սկանդալների և մութ պատմությունների մեջ։ Մեծ հաշվով վարկաբեկված չեն ու չեն խաբել հանրությանը որևէ հարցում։ Ինչևէ, առաջիկա պրոցեսները, ինչպես բազմաթիվ վերլուծաբաններ են կանխատեսում, չի սպառնում լինել բացառապես սևի և սպիտակի ընտրություն։ «Լուսավոր Հայաստան» քաղաքական կապիտալն ու վարկը թույլ են տալիս այդ ուժին ավելի պայծառ գույներ բերել ընտրական պրոցեսներին։

Կարեն Դանիելյան 
Pressmedia.am