Իշխանությունների որդեգրած քաղաքականությունն է սեփական մեղքը ուրիշների վրա բարդելը

Նիկոլ Փաշինյանը պատերազմում կրած պարտության մեջ մեղավորել է ում հնարավոր է եղել, բայց սեփական մեղավորության մասին երբեք չի խոսել: Այս թեմայով pressmedia.am  կայքը զրուցել է բժիշկ, ազատամարտիկ Տարոն Տոնոյանի հետ։

— Պարոն Տոնոյան, արդյո՞ք ճիշտ եք համարում, որ իշխանությունը ոչ միայն քաղաքական, այլ նաև իրավական պատասխանատվություն չի կրել և մեղադրելով այլ մարդկանց՝ խուսափում է սեփական պատասխանատվությունից։

— Նիկոլ Փաշինյանի և իշխանությունների որդեգրած քաղաքականությունն է սեփական մեղքը ուրիշների վրա բարդելը։ Մեկ նախադասությամբ այդպես կբնորոշեի այս ամենը, իսկ մնացածը կարելի է եզրակացնել այս մտքերից։ Իրենք հայտարարում են, որ պատասխանատուն իրենք են, բայց ոչ մի պատասխանատվություն էլ չեն կրում։ Ինքը չակերտավոր պատասխանատու չէ և ուզում է  ասել, որ ո՛չ պատասխանատու է, ո՛չ էլ մեղավոր, բայց առաջին մեղավորն ու պատասխանատուն ինքն է։ 

— Արդյո՞ք արհեստական չեք համարում, որ այդ ամբողջ գործընթացից այսօր կալանավորված է մեկ մարդ՝ Դավիթ Գալստյանը, որ Հայաստան զենք ներմուծողն է՝ մասնավոր գործարար, ով  զենքը ներմուծել է ՊՆ-ի հետ համաձայնեցված, փորձաքննություն անցած, ՊՆ-ի կողմից առաջ քաշված չափանիշներով։ Եվ, ըստ էության, նախարարությունը դա հաստատել է։ Բայց այժմ այդ մարդը կալանավորված է, և  փորձում են ողջ մեղքը գցել նրա վրա։ Այլ մեղավորներ չկա՞ն այս երկրում։ Արդյո՞ք  նման անողնաշար գործերով հնարավոր է պատասխանատուներ գտնել և ողջ պատասխանատվությունը գցել այլ մարդու վրա՝ խուսափելով սեփական պատասխանատվությունից։

— Ով էլ որ զենք մատակարարի՝ պարտավոր է փորձաքննություն անցկացնել։ Ցավոք սրտի, ես մասնագետ չեմ և չեմ կարող ավելի մանրամասնորեն այդ գործի մասին խոսել, բայց այստեղ նորից նույն վարքագիծն է՝ սեփական մեղքը ուրիշի վզին փաթաթելու քաղաքականությունը։ Դա իրենց բնորոշ է, և դա վախկոտ մարդու, պատասխանատվությունից խուսափող մարդու, ուրիշների տաք շագանակները կրակից ուրիշների ձեռքով հանելու քաղաքականության շարունակությունն է։ 

Անի Ամիրյան

Pressmedia.am