Քաղտեխնոլոգը համարում է, որ Քոչարյանի դաշինքի մեկնարկը մտածված էր մինչև մանրուքներ

Rossaprimavera.ru-ն գրում է, որ ըստ քաղտեխնոլոգ Վիգեն Հակոբյանի` «Հայաստան» դաշինքի ստեղծման մասին հուշագիրը սկիզբ է դրել Հայաստանում նոր ուժի նախընտրական արշավի հաջող և համոզիչ մեկնարկին, չնայած այն հանգամանքին, որ դաշինքի կազմավորումը և դրա կազմը հայտնի էր դեռ մինչև մայիսի 9-ի հանրահավաքը:

Քաղտեխնոլոգը նշել է, որ այդ հանրահավաքի յուրաքանչյուր մանրուք մտածված էր. հուշագրի ստորագրման արարողությունը ուղիղ հեռարձակվել է Ազատության հրապարակում տեղադրված էկրաններին: Բացի այդ, նա նշել է այն էներգիան, որը զգացվում էր ընդդիմության հանրահավաքի ժամանակ: «Այս գործողությունը ցույց տվեց, որ դաշինքի մրցունակության հետ կապված կանխատեսումները տեղին են և արդարացված: Քաղաքական դաշտում ստեղծվել է կենսունակ դաշինք ` ուժեղ քաղաքական առաջնորդով, որը մտադիր է դառնալ նախընտրական գործընթացի առաջատարներից մեկը (եթե ոչ ամբողջ ընդդիմություն) և հաղթել Նիկոլ Փաշինյանին: Մայիսի 9-ին Քոչարյանը, որպես դաշինքի ղեկավար, ցույց տվեց իր ուժը և առաջարկեց քաղաքացիներին այլընտրանք», - ասել է Հակոբյանը:

Մայիսի 9-ը, ըստ քաղաքական ստրատեգի, պատահական չէր ընտրված, քանի որ հարթակում կային մարդիկ, ովքեր ժամանակին նպաստել էին Ղարաբաղի առաջին պատերազմում տարած հաղթանակին: Այսպիսով, նրա խոսքերով, նրանք հակադրվում են երկրի ներկայիս իշխանություններին, որոնք երկրորդ ղարաբաղյան պատերազմում պարտություն կրեցին և կորցրեցին մի շարք տարածքներ, այդ թվում ՝ Շուշին:

Հակոբյանը կարծում է, որ ցանկացած քաղաքական գործիչ, որը ժամանակին եղել է իշխանություն, վերադարձել է քաղաքականություն և մտադիր է մեկ անգամ ևս ղեկավարել երկիրը, փորձում է վերլուծել իր բացթողումներն ու սխալները, որպեսզի պատասխանի ընտրողների ունեցած հարցերին:


Կարեն Սիմոնյան
Pressmedia.am