11 խորհուրդ, որոնց հետևելու դեպքում ձեր կինն իրեն երջանիկ կզգա

Tert.am-ը գրում է.

Երջանիկ ամուսնությունը հնարավոր է միայն, եթե ձեր սիրելին երջանիկ է: Սեփական փորձով այս համոզմանն է եկել նաև Թրոյ Սթոունքինգը, ով 25 տարվա ամուսնության ընթացքում հասկացել է, որ մանրուքներն անչափ կարևոր դեր են խաղում խաղաղ ու երջանիկ կյանքում:

«Ես ամենևին էլ կատարյալ չեմ, շարունակում եմ սխալներ թույլ տալ, սակայն անում եմ հնարավորինս ամեն բան լավ ամուսին լինելու համար»,-նշել է տղամարդը։

Ստորև AdMe.Ru-ն ներկայացնում է 11 արժեքավոր խորհուրդ Սթոունքինգից, որոնց ինքն անձամբ հետևում է տարիներ շարունակ ու երջանկացնում իր կնոջը։

1. Օգնե՛ք նրան տնային մանր-մունր գործերում

Առավոտյան ես դասավորում եմ մաքուր լվացած ափսեները, թափում եմ աղբը, իսկ երբեմն էլ հարդարում եմ անկողինը: Նման մանր-մունր տնային գործեր անելով` ես կնոջս ցույց եմ տալիս, որ ցանկանում եմ օգնել նրան:

2. Նրա ցանկությունները պետք է առաջնային լինեն ձեզ համար

Ես միշտ սկզբում հարցնում եմ նրան, թե ինչ կցանկանար ուտել ընթրիքին: Զբոսնելու ժամանակ միշտ հարմարվում եմ նրա քայլքին: Ինձ համար առաջին տեղում կինս է, բայց դա չի նշանակում, որ ես «փալաս» եմ: Պարզապես ես հարգում եմ նրա ցանկությունները:

3. Լսե՛ք նրան` առանց ընդհատելու

Երբեմն կինը խոսելու, սիրտը բացելու, լիցքաթափվելու կարիք ունի: Պարզապես թույլ տվեք նրան հանգիստ խոսել և միայն վերջում առաջարկել խնդրի լուծման ձեր տարբերակը:

4. Նրան քնքշորեն վերաբերվեք

Կինս ինձանից երբեք կոպիտ խոսքեր չի լսում, քանի որ իմ մեծ սերը դա թույլ չի տալիս: Նույնիսկ եթե մենք վիճում ենք, միշտ փորձում ենք զսպել հույզերը:

5. Նրա հետ ձեզ դաստիարակված պահեք

Ես միշտ կնոջս ասում եմ «շնորհակալություն», «խնդրում եմ» բառերը, քանի որ ցանկանում եմ ամեն կերպ ցույց տալ նրան իմ սերն ու ջերմ վերաբերմունքը: Բացի այդ, ես կնոջս հետ խոսում եմ այնպիսի յուրահատուկ ձևով, որով չեմ խոսում ուրիշ ոչ ոքի հետ:

6. Նրան հաճախ հաճոյախոսեք

Ես միշտ նկատում եմ գնված նոր զգեստը կամ ոճային սանրվածքը: Ընկերների շրջապատում գովում եմ նրան ու հաճոյախոսում: Բայց ես կնոջս մասին լավ բաներ եմ ասում նույնիսկ, եթե նա կողքիս չէ: Ուզում եմ, որ բոլորն իմանան, թե ինչ զարմանահրաշ կնոջ եմ ես սիրում:

7. Մի՛ խուսափեք պարտականություններից

Ես մշտապես կատարում եմ տնային հարցերում իմ ունեցած պարտականությունները, քանի որ չեմ ուզում դրանք թողնել կնոջս։

8. Լսե՛ք, ներողությո՛ւն խնդրեք ու հետևություննե՛ր արեք

Ականջ դրեք կնոջ տված խելացի խորհուրդներին, ընդունեք տեղին արված նկատողություններն ու ճիշտ հետևություններ արեք: Դա զգալի կհեշտացնի ձեր կյանքը:

9. Հետաքրքրվե՛ք նրա կարծիքով

Երբ ես կանգնած եմ բարդ ընտրության առաջ, միշտ նրանից խորհուրդ եմ հարցնում։ Նա շատ խելացի է, ուստի՝ տված խորհուրդները միշտ արժեքավոր են:

10. Քաջալերե՛ք նրան

Կինս շատ է սիրում նկարել, ուստի ծննդյան օրվա առթիվ ես նրան նվիրեցի նկարչության դասընթացների «տոմս»: Ես ուզում եմ, որ նա իրագործի իր բոլոր երազանքներն ու քաջալերում եմ նրան բոլոր նախաձեռնություններում:

11. Ասեք, որ սիրում եք նրան

Օրվա մեջ մի քանի անգամ ես կնոջս ասում եմ, թե ինչքան եմ սիրում նրան։ Այդ բառերը չեն կորցնում իրենց զորությունը, քանի որ ես ամեն անգամ դրանք ասում եմ ի սրտե:

«Այն ամենը, ինչ ես անում ու ասում եմ օրվա ընթացքում, մեծ ազդեցություն է ունենում կնոջս վրա: Ես անում եմ ամեն ինչ նրան երջանկացնելու համար, քանի որ դա իմ պարտականությունն է` որպես ամուսին: Մենք երկուսս էլ պետք է ձգտենք երջանկացնել միմյանց»,-եզրափակել է Սթոունքինգը: