Հայկ Դեմոյանն անընդունելի է համարում Հայոց ցեղասպանության հարցի քննարկան առնչությամբ Բունդեսթագի «աճպարարությունը»

Հայոց ցեղասպանության միջազգային ճանաչման գործընթացը կարևոր է, բայց ոչ գերնպատակ: Լրագրողների հետ տարեվերջյան հանդիպման ժամանակ ասաց Հայոց ցեղասպանության թանգարան-ինստիտուտի տնօրեն Հայկ Դեմոյանը: Անդրադառնալով Գերմանիայի կողմից Հայոց ցեղասպանության հարցը քննարկման դնելու գործընթացներին` Դեմոյանն անընդունելի համարեց «աճպարարությունը, որ արվում է Բունդե սթագում»: «Միգուցե գերմանական կողմի համար շատ դժվար է ընդունել կապը ու մեղսակցությունը Թուրքիայի հետ, բայց Գերմանիան  այն պետությունն է, որը խորապես ընդունեց իր մեղքը ու ապաշխարեց Երկրորդ աշխարհամարտի ընթացքում մարդակության դեմ իրագործած զանգվածային հանցագործությունների համար»,-«Արմենպրես»-ի հաղորդմամբ` ասաց Դեմոյանը:

Նրա խոսքով` գերմանական շրջանակները փորձում են երկու երեսով հարցին անդրադառնալ, որը մեկտեղելի չէ: «Պետք է ընտրել դրանցից մեկը` կամ հարում են թուրքական ժխտողականությանը և ընդունում են լիակատար մեղսակցությունը, կամ ըմբռնում են իրենց սխալը, ապաշխարում դրա համար և դատապարտում Թուրքիայի կողմից ցեղասպանության իրագործումն ու ժխտումը»,-ընդգծեց ՀՑԹԻ տնօրենը:

Անդրադառնալով ներկայում Մերձավոր Արևելքում ծավալվող գործընթացներին` նա նկատեց, որ ականատես ենք լինում ցեղասպանության, որը կատարվում է այն նույն տարածաշրջանում, հնչում են նույն տեղանունները` Ռաքքա և Դերզոր, ինչ 100 տարի առաջ:

Ինչ վերաբերում է Լատինական Ամերիկայի մի քանի երկրների կողմից Հայոց ցեղասպանության ճանաչմանն ու դատապարտմանը, Հայկ Դեմոյանը չցանկացավ գնահատական տալ` նշելով, որ ճանաչումներն ունեն որոշակի ներքաղաքական ու արտաքին քաղաքական ենթատեքստեր: «Բայց թուրքական կողմի ջղաձգումները, արձագանքները, դեսպաններին հետ կանչելը նպաստում են, որ այդ երկրներում հետաքրքրություն առաջանա Հայոց ցեղասպանության վերաբերյալ, գոնե այդ պարզ հարցադրումով` ինչու Թուրքիայի դեսպանը հետ գնաց Անկարա»,-ավելացրեց Դեմոյանը: