Նախընտրական քարոզչության կեղծ մեկնարկը՝ ֆալշստարտը, Հայաստանում. ո՞վ կորակազրկի խախտողներին

Iarex.ru-ն գրում է, որ դեռևս Հայաստանում արտահերթ ընտրությունների պաշտոնական ամսաթիվը չհայտարարված (ընտրությունները տեղի կունենան հունիսի 20-ին), արդեն պարզ էր, որ իշխանության համար հիմնական պայքարը ծավալվելու է ներկայիս վարչապետի պաշտոնակատար Նիկոլ Փաշինյանի և նախկին նախագահ Ռոբերտ Քոչարյանի միջև:

Քոչարյանը, ով դեմ էր գործող կառավարության պայմաններում ընտրություններ անցկացնելուն, դեռևս մարտին հայտարարել էր, որ եթե ընտրություններ նշանակվեն, ինքը կմասնակցի դրանց և, անշուշտ, կհաղթի, քանի որ, իր իսկ խոստովանությամբ, նա երբեք չի պարտվել ընտրություններում: Սակայն փաստն այն է, որ նրա հաղթած բոլոր ընտրություններն անց են կացվել այն ժամանակաշրջանում, երբ ինքն է եղել իշխանություն: Ակնհայտ է, որ ընտրություններին մասնակցելու ցանկությունը առաջին հերթին պայմանավորված է վրեժ լուծելու ցանկությամբ: Ի վերջո, իշխանության գալուց հետո Նիկոլ Փաշինյանը գործ էր կհարուցել Քոչարյանի դեմ` 2008 թվականի մարտի 1-ին, բողոքի ցույցերը ճնշելու համար (որի արդյունքում զոհվել էր 10 մարդ), բայց դատարանը արդարացրել է Քոչարյանին:

Եթե հիմա Ռոբերտ Քոչարյանին հաջողվի հաղթել և դառնալ վարչապետ, ապա առաջին հերթին նա կհանձնարարի հետաքննություն սկսել ղարաբաղյան պատերազմում Հայաստանի պարտության վերաբերյալ: Հասկանալի է, որ ով էլ գա իշխանության պարտավոր է դա անել: Այլ հարց է, որ Քոչարյանն անելու է նույնը, ինչ նրանք արել են իր հետ: Եթե Փաշինյանը 2018 թվականին անցնելով իշխանության ի սկզբանե Քոչարյանին էր նշանակել մարտի 1-ի դեպքերի մեղավոր, ապա նմանապես Քոչարյանի համար առաջին տեղում լինելու է ոչ թե գործի քննությունը, այլ Փաշինյանի մեղքի ապացույցների որոնումը: Այսինքն Ռոբերտ Քոչարյանը ցանկանում է վերադառնալ վրեժ լուծելու համար: Ի դեպ, այդ կարծիքը կիսում է նաև առաջին նախագահ Լևոն Տեր-Պետրոսյանը:

Նախկինում նա Նիկոլ Փաշինյանի վերընտրությունը կանխելու համար առաջ էր քաշել երեք նախագահներին միավորելու գաղափարը: Միևնույն ժամանակ, նա առաջարկել էր, որ երեք նախագահներից ոչ մեկը չպետք է որևէ պետական պաշտոն զբաղեցնի դաշինքի հաղթանակի դեպքում, բայց երկու նախկին նախագահներն էլ հրաժարվել են դրանից, բայց Քոչարյանի մերժումը, ըստ Տեր-Պետրոսյանի, վկայում է այն մասին, որ նա առաջնորդվում է ոչ թե պետական շահերով, այլ Նիկոլ Փաշինյանից վրեժ լուծելու բացառիկ ցանկությամբ: Եվս մեկ ապացույց այն բանի, որ գործ ունենք կառավարության ղեկավարի երկու հիմնական թեկնածուների բաց մրցակցության հետ այն է, որ քարոզարշավի մեկնարկը նշանակված է հունիսի 7-ին, բայց արդեն այս երկու քաղաքական գործիչներին աջակցող ուժերը հանդիպումներ են անցկացնում ընտրողների հետ:

Բացի այդ, ներկայիս վարչապետը, չնայած վարչապետի պաշտոնակատար է, բայց արձակուրդ չի վերցրել, ինչպես պահանջում է օրենքը: Սա ակնհայտ կեղծ մեկնարկ է: Եվ ինչպես գիտնեք սպորտում կեղծ մեկնարկ կատարած մարզիկը պետք է որակազրկվի: Սակայն չմոռանանք, որ գործ ունենք Հայաստանի հետ, որտեղ նույնիսկ պատերազմում կրած պարտությունից հետո կառավարությունը ոչ միայն հրաժարական չի տալիս, այլ անգամ ամեն կերպ փորձում է ամրապնդվել իշխանության գլխին: Հետևաբար, բոլոր հույսերը թողնված են քաղաքացիների գիտակցությանը:

Աննա Սայադյան
Pressmedia.am