Քոչարյանը նշել է Մեղրին հանձնելու հարցով Փաշինյանի բացատրության անտրամաբանականությունը

Rossaprimavera.ru-ն գրում է, որ այն մեղադրանքները, որ որպես նախագահ ինքը քննարկել է Մեղրու շրջանը Ադրբեջանին հանձնելու հարցը, Հայաստանի երկրորդ նախագահ Ռոբերտ Քոչարյանը հերքել է մայրաքաղաքի Էրեբունի վարչական շրջանում ընտրողների հետ հանդիպման ժամանակ:

«Երբ ես նախագահ էի, երեք առաջարկ եմ ստացել, մեկը վերաբերվել է ընդհանուր պետության գաղափարին, երկրորդը Քի Ուեսթի գործընթացն է եղել, երբ Հեյդար Ալիևը վերջին պահին հրաժարվել է համաձայնագիրը ստորագրել, իսկ երրորդը Մադրիդյան սկզբունքներն են, այլ պաշտոնական առաջարկներ չեն եղել», - ասել է Քոչարյանը: Նախկին նախագահը նշել է, որ Մեղրիի վերաբերյալ ԵԱՀԿ Մինսկի խմբի համանախագահների կողմից առաջարկներ չեն եղել:

Այնուամենայնիվ, բացատրել է Քոչարյանը, Մեղրին փոխանակելու տարբերակը առաջարկել է Հեյդար Ալիևը, բայց դրա պաշտոնական գրանցում չի եղել, քանի որ հայկական կողմի պատասխանը պարզ է եղել. Հայաստանը չի կարող համաձայնվել Իրանի հետ սահմանի կորստի հետ: «Պատասխանը համոզիչ էր և հասկանալի», - շեշտել է Քոչարյանը նշելով, որ Հեյդար Ալիևը բազմիցս է փորձել միջնորդների միջոցով խթանել այդ գաղափարը:

«Բայց ԵԱՀԿ Մինսկի խմբի շրջանակներում այդ հարցը քննարկման առարկա չի եղել», - ավելացրել է նա: Քոչարյանը ուշադրություն է հրավիրել այն փաստի վրա, որ փորձում են Մեղրիի հարցը կապել 1999 թվականի հոկտեմբերի 27-ին Հայաստանի խորհրդարանում տեղի ունեցած ահաբեկչության հետ ներկայացնելով այն այնպես, որ Վազգեն Սարգսյանն ու Կարեն Դեմիրճյանը Անվտանգության խորհրդի նիստում դեմ են եղել Մեղրին հանձնելուն և իբր վճարել են դրա համար իրենց կյանքով: Բայց այդ դեպքում տրամաբանական կլիներ, նշել է նախկին նախագահը, որ նրանց մահից հետո այդ գաղափարը իրականություն դառնար, իսկ փաստացի այդ հարցը ընդհանրապես դուրս է եկել Հայաստանի քաղաքական օրակարգից: Հետևաբար, նման կապի մեջ տրամաբանություն չկա, շեշտել է Քոչարյանը:

Հիշեցնենք, որ Փաշինյանի կնոջը պատկանող «Հայկական ժամանակ» թերթը հրապարակել էր մի քանի կետերից տեքստ, որոնք իբր քննարկվել են Հայաստանի ղեկավարության կողմից 1999 թվականին և տեքստի պարբերություններից մեկում նշվում է Մեղրիի շրջանը Ադրբեջան հանձնելու մասին:

Ավելի վաղ այդ թեման բարձրացվել էր Հայաստանի վարչապետ Նիկոլ Փաշինյան. ըստ նրա 1999 թվականին Քոչարյանը, իբր, Անվտանգության խորհրդի նիստում քննարկել է Մեղրիի շրջանը Ադրբեջան տեղափոխելու հարցը: Փաշինյանը նաև բարձրաձայնել է դրա և խորհրդարանում տեղի ունեցած ահաբեկչության կապի մասին վարկածը, երբ սպանվել են վարչապետ Վազգեն Սարգսյանն ու Ազգային ժողովի նախագահ Կարեն Դեմիրճյանը, և իբր այդ հարցում իրենց բացասական կարծիքի պատճառով:

Աննա Սայադյան
Pressmedia.am