Փաշինյանը Սյունիքը հանձնելու գիծ է բռնել

Սյունքիում վերջին օրերին քաղաքական հակառակորդների դեմ իրականացվող լայնածավալ հետապնդումները վկայում են՝ Նիկոլ Փաշինյանի իշխանությունը Սյունիքը հանձնելու գիծ է բռնել և փորձում է կոտրել տեղի ընդդիմադիր և ազդեցիկ ուժերի դիմադրությունը։ Հետապնդումները ուժգնացան ՌԴ նախագահի Վլադիմիր Պուտինի հետ հանդիպումից հետո, երբ Փաշինյանին բաց տեքստով հայտարարվեց, թե «ժողովրդի վստահությունը» ունեցող անձի առջև բարդ, շատ սուր և զգայուն հարցերի օրակարգ է իջեցված, որին պետք է պարտադիր լուծում տրվի։

Կարելի է փաստել, որ Սյունիքով թշնամուն տրանսպորտային միջանցք տրամադրելու հարցում նոր պայմանավորվածություններ են ձեռքբերվել, իսկ դրա միակ խոչընդոտը ընդդիմադիր «Վերածնվող Հայաստան» կուսակցության ակտիվ անդամներն են։

Կալանավորվել է Քարահունջի համայնքապետը, բերման ենթարկվել Գորիսի քաղաքապետ Առուշ Առուշանյանը, խուզարկություններ են իրականացվում Քաջարանի քաղաքապետ Մանվել Փարամազյանի բնակարանում։ Քիչ առաջ էլ ԶՊՄԿ տնօրենների խորհրդի անդամ, «Վերածնվող Հայաստան» կուսակցության ղեկավար Վահե Հակոբյանը հայտնեց, թե ոստիկանությունը, ՊԵԿ-ը, ԱԱԾ-ն, ՀՔԾ-ն ապօրինի խուզարկություններ են սկսել Զանգեզուրի պղնձամոլիբդենային կոմբինատում։

Կազմալուծելով Զանգեզուրի ամենախոշոր ձեռնարկությունը, որտեղ հազարավոր մարդիկ են աշխատում, հետապնդելով և ձերբակալելով ընդդիմության ազդեցիկ առաջնորդներին, Սյունիքի բնակիչներին թողնելով ադրբեջանական հրոսակների ահաբեկումների հետ միայնակ՝ Նիկոլ Փաշինյանի իշխանությունը դավադիր և ստոր ծրագիր է իրականացնում ընդդեմ Սյունիքի, ընդդեմ Հայաստանի Հանրապետության կենսական շահերի։

Գաղտնիք չէ՝ սեփական իշխանությունը պահելու համար «քայլողները» պատրաստ են ցանկացած դավաճանության, և այդ ճանապարհին չեն խորշի ոչ մի հանցագործությունից։ Իսկ այդ ընթացքում արնաքամ է լինում մեր պետությունը։


Անի Կարապետյան