Կազմվել է «Եռաբլուրում» հուղարկավորված զինծառայողների գերեզմանների կառուցապատման նախագիծ-առաջարկը. ՊՆ

Ս.թ. փետրվար-մարտ ամիսներին, մասնագետները կազմել են «Եռաբլուր» զինվորական պանթեոնում հուղարկավորված 2020 թվականի 44-օրյա պատերազմում  զոհված զինծառայողների գերեզմանների կառուցապատման, ինչպես նաեւ հիշատակը հավերժացնող հուշարձան-կոթողի նախագիծ-առաջարկը: Այս մասին NEWS.am-ը տեղեկանում է Պաշտպանության նախարարությունից։

Պաշտպանության նախարարության ղեկավարությունը որոշում է կայացրել աշխատանքներն իրականացնել 2 փուլով.

Հուշահամալիրի գերեզմանների շինարարական աշխատանքների իրականացում,

Բարեկարգման, ինժեներական համակարգերի եւ օժանդակ կառույցների իրականացում:

Սահմանված կարգով շինարարական 4 կազմակերպությունների հետ կնքվել են  պայմանագրեր եւ, յուրաքանչյուր կազմակերպության համար առանձնացված տեղամասերում, նախապես համաձայնեցված նախագծային լուծումներով, ներկայում իրականացվում է գերեզմանների կառուցապատումը` ներառյալ հաստատված հատակագծերով հուշաքարերի տեղադրումը, բազալտե հատակի կառուցումը եւ այլն: Թեեւ հուշաքարերը հատակագծվել են քննարկելով մի խումբ հարազատների հետ, համաձանեցվել ճարտարապետի հետ, այնուամենայնիվ, որոշ հարազատներ հայտնել են իրենց  անհամաձայնությունը:

Որպես խնդրի լուծում՝ պաշտպանության նախարարի հանձնարարությամբ, տեղում դրվել են մատյաններ, որտեղ զոհվածների հարազատները կարող են ներկայացնել իրենց առաջարկները, որոնք կուսումնասիրվեն, կամփոփվեն եւ սեղմ ժամկետում կկայացվի վերջնական որոշում:

Զուգահեռաբար, ճարտարապետը եւ նախագծային կազմակերպությունը  մշակում են զոհվածների հիշատակը հավերժացնող կոթողի, ինչպես նաեւ «Եռաբլուր» զինվորական պանթեոնի տարածքի ենթակառուցվածքի նախագծա-նախահաշվային փաստաթղթերը, որոնք ներառելու են տարածքների բարեկարգման, ասֆալտապատման, եզրաքարերի տեղադրման ու ջրահեռացման, ոռոգման ցանցերի, էլեկտրական լուսավորման ու տեսահսկման համակարգեր: Նախատեսվում են նաեւ հսկիչ-անցագրային կետի, հասարակական սանհանգույցի կառուցում եւ տարածքի ընդհանուր ցանկապատում:

Նշված ճարտարապետահատակագծային եւ նախագծային գործընթացի սահմանված կարգով նախապատրաստական աշխատանքների ավարտը նախատեսվում է 2021թ. տարեվերջին, իսկ կառուցապատման մեկնարկը՝ 2022թ. առաջին կամ երկրորդ եռամսյակներում՝ կախված եղանակային պայմաններից: