Քաղաքական ճգնաժամը կարգավորված չէ․ ԲՀԿ-ի վերադարձի հրամայականը

Խորհրդարանական արտահերթ ընտրություններն այդպես էլ չկարգավորեցին քաղաքական ճգնաժամը, որ ձևավորվել էր պատերազմում կրած պարտությունից հետո։ Ազգային ժողովին չի հաջողվել դառնալ իրապես քաղաքական մտքի կենտրոն, և խորհրդարանում երկրի ու պետության առջև ծառացած կենսական խնդիրները լուծելու փոխարեն ականատեսն ենք դառնում ծայրաստիճան հակադիր իրավիճակների, հայհոյանքների ու, անգամ, ծեծկռտուքների։ Նոր խորհրդարանում թե՛ իշխանությունը, թե՛ ընդդիմությունը հստակ ասելիք չունեն, իսկ դիսկուրսը ծավալվում է զուտ «թալանչիներ-դավաճաններ» ծիրի շրջանակներում, մինչդեռ բազմաթիվ օրակարգային խնդիրներ մնացել են լուծման կարոտ։ Այս իմաստով, խորհրդարանը չի կարող երկար կյանք ունենալ, ի վերջո, հանրությունը մոտ ապագայում կրկին կանգնելու է արտահերթ ընտրությունների պահանջի առջև։

7-րդ գումարման խորհրդարանական ընդդիմությունը իր զուսպ և հավասարակշիռ կեցվածքով, բարձրացրած հարցերի կարևորությամբ, ժողովրդի խնդիրներին տրված լուծումներով կրկին հավակնելու է լուրջ ազդեցության ապագա քաղաքական գործընթացներում։ Նախորդ չորս գումարումներում Ազգային ժողովում լրջագույն ներկայացվածություն ունեցած և շարքային քաղաքացու բազում խնդիրների լուծմանը նպաստած «Բարգավաճ Հայաստանն» այս խորհրդարանում ներկայացված չէ։ ԲՀԿ-ն քարոզարշավին չմտավ բևեռացված գաղափարներով, հայհոյախոսությամբ, փոխարենը ներկայացրեց տնտեսության, քաղաքականության տարբեր ոլորտների մասին իր տեսլականը, խնդիրների լուծման հստակ մոտեցումները։ Օբյեկտի՞վ էր, թե՞ ոչ խորհրդարանում չհայտնվելը, այսօր արդեն անիմաստ է քննարկել։ «Բարգավաճ Հայաստանը» շարունակում է իր ակտիվ քաղաքական գործունեությունը, ԱԺ պատերից դուրս էլ սպասարկում հանրային շահը։

«Մենք ժողովրդի կողքին ենք, քննարկել ենք, մասնակցել ենք, ներկայացրել ենք մեր տեսակետը, մեր մոտեցումը, թե ինչպես կարելի է այս վիճակից դուրս գալ: Անկախ ամեն ինչից, մենք խորհրդարանում ենք, թե ոչ՝ դա չի նշանակում, որ մենք մեր ժողովրդի կողքին չենք: Ցանկացած բան, ինչ օգուտ կբերի, մեր հնարավորությունների սահմաններում միշտ էլ արել ենք, անում ենք, անելու ենք»,- ասել է Ծառուկյանը՝ հավելելով, որ խորհրդարան չանցնելը ոչինչ չի փոխում կուսակցության պլաններում: Սա փաստացի նշանակում է, որ ԲՀԿ-ն չի նվազեցնելու իր ակտիվությունը քաղաքական դաշտում, իսկ դա իսկապես կարևոր է, հատկապես առաջիկա գործընթացներին մասնակցության առումով։

Կարեն Պետրոսյան