Բջնիում բացվեց Արցախյան ազատամարտում ու Հայրենական մեծ պատերազմում զոհված մարտիկներին նվիրված հուշակոթողը
Հասարակություն
Կոտայքի մարզի Բջնի համայնքում մայիսի 23-ին տոնական մթնոլորտ էր. համայնքի բնակիչները և բազմաթիվ հյուրեր ներկա գտնվեցին Արցախյան ազատամարտում ու Հայրենական մեծ պատերազմում զոհված մարտիկներին նվիրված հուշակոթողի հանդիսավոր բացմանը: Հուշակոթողի բացման հանդիսավոր արարողությանը մասնակցեցին ՀՀ պաշտպանության նախարար Սեյրան Օհանյանը, Կոտայքի մարզպետ Կարապետ Գուլոյանը, ՀՀ Երկրապահ կամավորականների միության նախագահ Մանվել Գրիգորյանը, Սjունիքի մարզպետ Սուրիկ Խաչատրյանը, Բջնի համայնքի ղեկավար Արմեն Մաթևոսյանը բարձրաստիճան զինվորականներ, «Ղարաբաղյան պատերազմի վետերաններ» ՀԿ ներկայացուցիչներ և այլք:
«Արցախյան հերոսամարտին մասնակցած բջնեցի քաջորդիներից հինգը չվերադարձավ: Մեր պատերազմը դեռ ավարտված չէ, և ես համոզված եմ, որ Արցախյան հերոսամարտը վերականգնեց հայ ժողովրդի արժանապատվությունը: Մենք այսօր ունենք հզոր ազգային բանակ, եռասերունդ երկրապահ, որոնք կարողանալու են ամուր պահել մեր ձեռբերումները», իր ելույթում նշեց հուշակոթողի հովանավոր Սյունիքի մարզպետ Սուրիկ Խաչատրյանը:
Հուշակոթողի օրհնության կարգը կատարեց ՀՀ զինված ուժերի հոգևոր առաջնորդ Վրթանես եպիսկոպոս Աբրահամյանը:
ՀՀ պաշտպանության նախարար Սեյրան Օհանյանը նկատեց, որ մեր տոնացույցում մայիսը հաղթանակների ամիս է: «Մենք հաղթանակներ ենք տարել Ավարայրում, Սարդարապատում, Ղարաքիլիսայում, Բաշ-Ապարանում և Հայրենական մեծ պատերազմում. հաղթանակներ, որոնք մեր մեծերի, մեր պապերի, մեր ծնողների կողմից իրագործվել և փոխանցվել են մեր սերնդակիցներին: Մեր պապերը 70 տարի առաջ տարած հաղթանակով մեր մեջ սերմանեցին հերոսություն, քաջություն և հայրենասիրական վսեմ հատկանիշներ, որոնք օգնեցին մեզ հաղթանակներ տոնել Շուշիում և ստեղծել Արց ախի պաշտպանության բանակը: Արցախյան ազատամարտը յուրաքանչյուրիս համար սուրբ ազատամարտ է, որում մեզ հաջողվել է պահպանել մեր ինքնությունը»,-ընդգծեց նա:
ՀՀ պաշտպանության նախարար Սեյրան Օհանյանը համապատասխանաբար «Անդրանիկ Օզանյան» և «Դրաստամատ Կանայան» մեդալներով պարգևատրեց հուշարձանի կառուցման նախաձեռնող խմբի ղեկավար Աղաբեկ Խաչատրյանին, հուշակոթողի հովանավոր Սուրիկ Խաչատրյանին, Բջնի համայնքի ազատամարտիկներին:
Միջոցառմանը հաջորդեց ՀՀ պաշտպանության նախարարության «Զորական» անսամբլի հանդիսավոր համերգը, որի ավարտից հետո հատուկ նշանակության ստորաբաժանումները անցկացրեցին մարտական և ձեռնամարտի հնարքների ցուցադրական պարապմունքներ:
1
2
3
4
5
1
2
3
5
1
2
3
4
5
