Ինչո՞ւ չի հրապարակվում պատվաստման հակացուցում ունեցող մարդկանց թիվը

Հայաստանի Հանրապետության առողջապահության նախարար Անահիտ Ավանեսյանի՝ այս տարվա օգոստոսի 20-ի 65-ն հրամանով սահմանվեց, որ Հայաստանի քաղաքացիները հոկտեմբերի 1-ից պետք է կա՛մ պատվաստվեն կորոնավիրուսի դեմ, կա՛մ 14 օրը մեկ թեստի բացասական պատասխանով ներկայանան աշխատանքի: ԱԺ «Հայաստան» խմբակցությունն այս հրամանի օրինականությունը հիմա վիճարկում է Սահմանադրական դատարանում: Մենք այլ հարթությունում քննարկենք հարցը: 

Ամեն առավոտ առողջապահության նախարարությունը հրապարակում է կորոնավիրուսի ստեղծած իրավիճակի մասին թվեր. այսքան վարակված, այսքան առողջացած, այսքան մահ, այսքան պատվաստված, այսքան բուժվող: Կա մի թիվ, որի մասին համառորեն լռում է նախարարությունը: Ու սա հիմք է տալիս տարբեր լուրերի:

Առողջապահության նախարարի 65-ն հրամանում հստակ գրված է, որ պատվաստվելու բժշկական հակացուցումներ ունեցող աշխատողները գործատուին ներկայացնում են կորոնավիրուսային հիվանդության (COVID-19) պատվաստման բժշկական հակացուցումների մասին բժշկական փաստաթուղթ՝ տրված առողջության առաջնային պահպանման բժշկի կողմից: Հակացուցում ունեցող քաղաքացին ազատվում է պատվաստվելու կամ թեստ հանձնելու պարտադրանքից: «Հակացուցում» բառն այս հրամանում հանդիպում է 344 անգամ:

Բայց ամեն առավոտ հրապարակվող տեղեկանքներում՝ ոչ մի անգամ: Չի ասվել ու չի ասվում, թե վարակված, առողջացած, մահացած, պատվաստված, բուժվող քաղաքացիներից բացի, քանիսն են հակացուցումների մասին տեղեկանք ներկայացրել: Եվ սա առնվազն զարմանալի է: Նախարարը որոշել է, որ հակացուցումների տեղեկանք պիտի տա բժիշկը: Այսինքն՝ բուժհաստատությունը, որտեղ գրանցվում են բոլոր այցերը: Այսինքն՝ հակացուցում ստացած քաղաքացիների մասին տեղեկությունը նույնքան հասանելի է նախարարին, որքան պատվաստված կամ վարակված քաղաքացիների մասին տվյալները: Չեն անում: Ու քանի որ չեն անում, հավաստի է դառնում լուրը, թե բուժհաստատություններին հրահանգված է հակացուցում չտալ ոչ ոքի: Անհնար է, որ Հայաստանում չլինի գոնե մեկ քաղաքացի, որ կորոնավիրուսի պատվաստման հակացուցում ունենա: Առավել եւս, որ պատվաստումը հակացուցված է նաեւ հղիներին:

Անահիտ Ավանեսյանն ուզում է ասել, որ Հայաստանում հղիներ չկա՞ն: Ցանկության դեպքում կարելի է հակացուցումների մասին երեք թիվ հրապարակել՝ դիմել է այսքան քաղաքացի, հակացուցում է ստացել այսքանը, որից այսքանը՝ հղի: Կամ՝ նախարարը հրամանով առողջության առաջնային պահպանման բժիշկներին վստահելով հակացուցումներ տալու գործը, իրականում նրանց չի վստահում ու մտավախություն ունի, որ նրանք «տեղեկանք կծախեն», կամ էլ, ինչպես պետական համակարգը, առողջության առաջնային պահպանման օղակն էլ լցրել են անտեղյակ յուրայիններով, որ գործից չեն հասկանում ու չեն կարող ցուցումը հակացուցումից տարբերել:

Երկու դեպքում էլ մեղավորը թավշյա իշխանությունն է, որն արդեն երեք տարի ասպատակում է Հայաստանն ու պատասխանատվություն չի վերցնում: Պատասխանատվությունից խուսափելու դրսեւորում է նաեւ մարդկանց պատվաստվելու հակացուցում չտալու հրահանգը: Իսկ եթե, Աստված մի արասցե, Հայաստանի մի քաղաքացի մահանա պատվաստումից առաջացած ալերգիկ պրոցեսներից, ի՞նչ է անելու Անահիտ Ավանեսյանը, որը, ըստ լուրերի, հրահանգել է հակացուցումներ չտալ ոչ ոքի: Կասի՝ նման մահեր այլ երկրներում էլ են եղել, ու վերջ: Հիվանդի մահը պարտություն է, իսկ Անահիտ Ավանեսյանը պարտությամբ հպարտներից մեկն է: Պատվաստման հակացուցում չտալու նրա հրահանգը պարտվելու, իրենց համար՝ հպարտանալու հիմք ստեղծելու քայլ է:

ՀԳ. Եթե մեր այս հրապարակումից հետո Անահիտ Ավանեսյանը սկսի հրապարակել նաեւ հակացուցում ունեցող քաղաքացիների քանակի մասին թվերը, դա եւս մեկ ապացույց կլինի, որ իրական է այն տեղեկությունը, թե պարտությամբ հպարտները բուժհաստատություններին հրահանգել են հակացուցումների տեղեկանք չտալ ոչ մեկին:

Արեգ ՄԱՐԳԱՐՅԱՆ