Գրիպի ստացիոնար բուժումն անվճար է. հիվանդանոցները հագեցած են դեղորայքով

Հայաստանում վերջին 20 օրերի ընթացքում նկատվել է սուր շնչառական հիվանդությունների զգալի աճ: Այդ մասին ՀՀ կառավարության այսօրվա նիստի մեկնարկից առաջ հայտարարեց առողջապահության նախարար Արմեն Մուրադյանը՝ հավելելով, որ ըստ Առոողջապահության համաշխարհային կազմակերպության հրապարակած տվյալների՝  եվրոպական տարածաշրջանում ևս կա գրիպի զգալի աճ, որի 56 տոկոսը պայմանավորված է գրիպի Ա տեսակի H1N1 հարուցիչով:

Արմեն Մուրադյանի խոսքով՝ դեկտեմբերի 30-ին ՀՀ վարչապետի հանձնարարականով ձևավորվել է արագ արձագանքման խումբ, ուժեղացվել են սահմանային անցակետերում գտնվող ծառայությունները, սահմանափակվել է հիվանդանոցների առանձին բաժանմունքների մուտքը, դասերը հետաձգվել են, կազմակերպվել է շուրջօրյա պոլիկլինիկական աշխատանք՝ ներառյալ շաբաթ և կիրակի օրերը: «Ընդհանուր առմամբ՝ 20 հազարից ավելի այց է եղել պոլիկլինիկաներ, որոնցից 7000-ը պայմանավորված է եղել սուր շնչառական հիվանդություններով»,-  «Արմենպրես»-ի հաղորդմամբ՝ ասաց նախարարը: Այսօրվա դրությամբ 948 հիվանդ հիվանդանոցներում է. հոսպիտալացվածների 80 տոկոսից ավելին երեխաներ են:

 Մուրադյանը նշեց, որ հիվանդներից 420-ը թոքաբորբ ունեն. նրանցից 213-ը երեխաներ են: Հսկողության տակ է գտնվում նաև 114 հղի, որից 38-ը՝ թոքաբորբով: «Վերակենդանացման բաժիններում գտնվում է 92 հիվանդ: Ցավոք սրտի, արձանագրվել են մահվան դեպքեր, 2015 թվականի տարեվերջին երեք, իսկ այս տարի՝ 8 մահվան դեպք, որոնք ունեցել են ուղեկցող հիվանդություններ կամ էլ ուշ են դիմել բժշկի»,- նշեց նախարարը՝ հավելելով, որ այս պահին 11 հիվանդ միացված է արհեստական շնչառական ապարատին, և նրանց վիճակը գնահատվում է ծայրահեղ ծանր:

Արմեն Մուրադյանի խոսքով՝ անկախ սոցիալական կարգավիճակից, բոլոր հիվանդների բուժումն իրականացվում է պետական պատվերի շրջանակում: Հիվանդանոցները հագեցած են համապատասխան դեղորայքով, այդ թվում՝ Տամիֆլյուով, որը նույնպես տրամադրվել է անվճար: Այն երեկվանից անվճար տրամադրվում է նաև ամբուլատոր ցանցում: 

Նախարարը տեղեկացրեց, որ դեռևս սեպտեմբերից շուրջ 15 հազար մարդ պատվաստվել է կամավոր սկզբունքով՝ ներառյալ խոցելի խմբերը, մասնավորապես մանկատները, ծերանոցները, հոգեբուժարաններում գտնվող հիվանդները, ինչպես նաև բուժհաստատությունների ընդունարանների և առաջին օղակի անձնակազմը: