Տարածաշրջանում նախորդ 2 շաբաթում գրանցված երկրաշարժերի հետևանքով զոհեր չկան

Սեյսմիկ պաշտպանության ծառայության դիտացանցը հունվարի 1-13-ն ընկած ժամանակահատվածում գրանցել է երկրաշարժ, որն զգացվել է ՀՀ և ԼՂՀ բնակչության կողմից: Ինչպես տեղեկացնում են ՍՊԾ գործակալությունից, երկրաշարժը տեղի է ունեցել հունվարի 12-ին Ադրբեջանում՝ Ջալիլաբադ քաղաքից 6 կմ դեպի հարավ-արևմուտք, ուժգնությունն էպիկենտրոնում կազմել է 5-6 բալ (մագնիտուդ 4.8): Ստորգետնյա ցնցումները, մասնավորապես, զգացվել են Կապան, Քաջարան, Գորիս (Սյունիքի մարզ) և Շուշի, Ստեփանակերտ, Ասկերան ու Հադրութ (Լեռնային Ղարաբաղ) քաղաքներում՝ 3-4 բալ ուժգնությամբ:

Տարածաշրջանում հունվարի 13-ին 4 բալ ուժգնությամբ (մագնիտուդ 3) երկրաշարժ է տեղի ունեցել Վրաստանում՝ Ախմետա քաղաքից 51 կմ դեպի հյուսիս-արևմուտք:

Տարածաշրջանից դուրս նոււյն ժամանակահատվածում գրանցվել է 6 և ավելի մագնիտուդով 4 երկրաշարժ: Հունվարի 1-ին Խաղաղ օվկիանոսի հարավում տեղի ունեցած 6.3 մագնիտուդով երկրաշարժի հետևանքով զոհեր և ավերածություններ չկան: Հունվարի 3-ին Հնդկաստանում՝ Իմպհալ քաղաքից 29 կմ դեպի հյուսիս-արևմուտք, գրանցվել է երկրաշարժ, որն ունեցել է 6.7 մագնիտուդ հզորություն:

Երկրաշարժի հետևանքով զոհվել է 9 մարդ, տուժել՝ 200-ը, վնասվել են տասնյակ շինություններ, կան ավերածություններ: Ստորգետնյա ցնցումներն զգացվել են Հնդկաստանի գրեթե բոլոր հյուսիսարևելյան և արևելյան նահանգներում, այդ թվում՝ Արևմտյան Բենգալիա, Նագալանդ, Մանիպուր քաղաքներում: Հունվարի 11-ին Ֆիլիպիններում՝ Սարագանի քաղաքից 230 կմ դեպի հարավ-արևելք, տեղի է ունեցել 6.5 մագնիտուդով երկրաշարժ: Նույն օրը 6.2 մագնիտուդով երկրաշարժ է գրանցվել Ճապոնիայում՝ Ռումոյի քաղաքից 74 կմ դեպի հյուսիս-արևմուտք: Վերջին երկու երկրաշարժերի հետևանքով զոհեր և ավերածություններ չկան: